നീറ്റിന് കുവൈറ്റിന് പുറമെ ദുബായിലും പരീക്ഷാ കേന്ദ്രം

ദുബായ്: അഖിലേന്ത്യാ പ്രവേശന പരീക്ഷയായ നാഷനല്‍ എലിജിബിലിറ്റി കം എന്‍ട്രന്‍സ് ടെസ്റ്റിന് (നീറ്റ്) കുവൈറ്റിനു പുറമെ ദുബായിലും പരീക്ഷാ കേന്ദ്രം അനുവദിക്കാന്‍ കേന്ദ്രസര്‍ക്കാര്‍ തീരുമാനം. അബൂദബിയിലെ യുഎഇ ഇന്ത്യന്‍ എംബസിയുടെ ഔദ്യോഗിക ട്വിറ്റര്‍ അക്കൗണ്ട് ഇക്കാര്യം സ്ഥിരീകരിച്ചു. ചരിത്രത്തിലാദ്യമായാണ് ഇന്ത്യക്കു പുറത്ത് നീറ്റ് പരീക്ഷയ്ക്ക് കേന്ദ്രങ്ങള്‍ അനുവദിക്കുന്നത്.

കുവൈറ്റില്‍ പരീക്ഷാ കേന്ദം അനുവദിച്ചതായി കഴിഞ്ഞയാഴ്ച കേന്ദ്ര വിദ്യാഭ്യാസ മന്ത്രി പ്രഖ്യാപിച്ചിരുന്നു. കൊവിഡ് നിയന്ത്രണങ്ങള്‍ മൂലം നീറ്റ് പരീക്ഷയ്ക്ക് ഹാജരാകാനുള്ള ബുദ്ധിമുട്ടുകള്‍ ചൂണ്ടിക്കാട്ടി നിരവധി പ്രവാസികള്‍ വിദേശകാര്യ മന്ത്രാലയത്തെ സമീപിച്ചതിന്റെ പശ്ചാത്തലത്തിലാണിത്. പ്രധാനമന്ത്രിയുടെ നിര്‍ദേശപ്രകാരമാണ് വിദ്യാഭ്യാസ വകുപ്പിന്റെ തീരുമാനമെന്ന് എംബസി അറിയിച്ചു.

Also Read: ദുബായ് എക്‌സ്‌പോയില്‍ പങ്കെടുക്കുന്ന ഇന്ത്യക്കാര്‍ക്കും യാത്രാനുമതി
സെപ്തംബര്‍ 12നു നടക്കുന്ന നീറ്റിന് ഓഗസ്റ്റ് ആറിനകം അപേക്ഷ സമര്‍പ്പിക്കണം. അതിനു മുമ്പ് യുഎഇ സെന്റര്‍ ഓപ്ഷന്‍ വെബ്‌സൈറ്റില്‍ ലഭ്യമാകും. 93 സിബിഎസ്ഇ സ്‌കൂളുകളും ഒന്‍പത് കേരള സിലബസ് സ്‌കൂളുകളുമുള്ള യുഎഇയില്‍നിന്ന് നൂറുകണക്കിന് വിദ്യാര്‍ഥികള്‍ നീറ്റ് പരീക്ഷ എഴുതുന്നുണ്ട്.
നേരത്തേ കുവൈറ്റില്‍ പരീക്ഷാ കേന്ദ്രം അനുവദിച്ചതിനുപിന്നാലെ യുഎഇയിലെയും മറ്റു ഗള്‍ഫ് രാജ്യങ്ങളിലെയും വിദ്യാര്‍ഥികള്‍ സെന്റര്‍ ആവശ്യപ്പെട്ട് കേന്ദ്രസര്‍ക്കാരിന് ഓണ്‍ലൈന്‍ നിവേദനം അയച്ചിരുന്നു.

കൊവിഡിന്റെ പശ്ചാത്തലത്തില്‍ യാത്രാ വിലക്കുള്ളതിനാല്‍ ജിസിസി രാജ്യങ്ങളിലുള്ള വിദ്യാര്‍ഥികള്‍ക്കു കുവൈറ്റിലോ നാട്ടിലോ പോയി പരീക്ഷ എഴുതാനാവില്ലെന്ന് ചൂണ്ടിക്കാട്ടിയായിരുന്നു നിവേദനം. നിലവില്‍ ജെഇടി, കീം പരീക്ഷകള്‍ക്കും ദുബായില്‍ സെന്ററുകളുണ്ട്.