ലൈസന്‍സില്ലാതെ റിക്രൂട്ട്മെന്റ് പാടില്ല
പുതിയ നിയമം അനുസരിച്ച്, മനുഷ്യവിഭവ, സ്വദേശിവല്‍ക്കരണ മന്ത്രാലയത്തിന്റെ ലൈസന്‍സ് ലഭിച്ചാല്‍ മാത്രമേ വീട്ടുജോലിക്കാരുടെ റിക്രൂട്ട്മെന്റോ താല്‍ക്കാലിക നിയമനമോ അനുവദിക്കുകയുള്ളൂ. 18 വയസ്സിന് താഴെയുള്ളവരെ ഗാര്‍ഹിക തൊഴിലാളിയായി റിക്രൂട്ട് ചെയ്യുന്നതോ ജോലി ചെയ്യിക്കുന്നതോ നിയമം കര്‍ശനമായി നിരോധിക്കുന്നു. പുതിയ നിയമമനുസരിച്ച്, റിക്രൂട്ട്മെന്റ് ഏജന്‍സി കരാറില്‍ സമ്മതിച്ച നിബന്ധനകള്‍ ലംഘിച്ചിട്ടുണ്ടെങ്കില്‍, ആ ഗാര്‍ഹിക തൊഴിലാളിയെ ജോലിക്ക് നിയമിക്കാതിരിക്കാന്‍ തൊഴിലുടമയ്ക്ക് അവകാശമുണ്ടായിരിക്കും. വീട്ടുജോലിക്കാരെ അവരുടെ രാജ്യത്ത് നിന്ന് റിക്രൂട്ട് ചെയ്യുന്നതിന് മുമ്പ് ജോലിയുടെ സ്വഭാവം, ശമ്പളം, മറ്റ് ആനുകൂല്യങ്ങള്‍ എന്നിവയെക്കുറിച്ച് അറിയിച്ചിരിക്കണം. അവരുടെ ശാരീരികക്ഷമത, ആരോഗ്യസ്ഥിതി, തൊഴില്‍പരമായ കഴിവുകള്‍ എന്നിവ വ്യക്തമാക്കുന്ന സര്‍ട്ടിഫിക്കറ്റുകള്‍ ജോലിക്ക് മുമ്പ് ലഭ്യമാക്കണം. മാനവ വിഭവശേഷി, സ്വദേശിവല്‍ക്കരണ മന്ത്രാലയം അംഗീകരിച്ച ഫോര്‍മാറ്റില്‍ മാത്രമേ തൊഴില്‍ കരാര്‍ തയ്യാറാക്കാന്‍ പാടുള്ളൂ. ഗാര്‍ഹിക തൊഴിലാളിയുടെ റിക്രൂട്ട്മെന്റുമായി ബന്ധപ്പെട്ട വ്യവസ്ഥകള്‍ ഉള്‍ക്കൊള്ളുന്നതാണ് കരാര്‍. ഇതില്‍ റിക്രൂട്ട്മെന്റിന്റെ കാലയളവ്, ശമ്പളം, ജോലിയുടെ സ്വഭാവം, തൊഴിലാളിയുടെയും തൊഴിലുടമയുടെയും അടിസ്ഥാന അവകാശങ്ങള്‍, ബാധ്യതകളും എന്നിവയും ഉള്‍പ്പെടുത്തണം.
റിക്രൂട്ട്‌മെന്റിന് കമ്മീഷനോ അധിക ഫീസോ പാടില്ല
റിക്രൂട്ട്മെന്റ് ഏജന്‍സി വ്യവസ്ഥകള്‍ ലംഘിക്കുന്ന സാഹചര്യത്തില്‍, ഒരു പകരം തൊഴിലാളിയെ നല്‍കാന്‍ ഏജന്‍സിക്ക് ഉത്തരവാദിത്തമുണ്ട്. അല്ലാത്ത പക്ഷം റിക്രൂട്ട്മെന്റ് ഫീസ് തൊഴിലുടമയ്ക്ക് തിരികെ നല്‍കണമെന്നും നിയമം വ്യവസ്ഥ ചെയ്യുന്നു. കരാര്‍ ലംഘനം മൂലമുണ്ടാകുന്ന നാശനഷ്ടങ്ങള്‍ക്ക് ഏജന്‍സി നഷ്ടപരിഹാരം നല്‍കേണ്ടിയും വരും. റിക്രൂട്ട്മെന്റ് ഏജന്‍സികള്‍ നേരിട്ടോ മൂന്നാം കക്ഷികള്‍ മുഖേനയോ, ഏതെങ്കിലും രീതിയില്‍ കമ്മീഷന്‍ ഈടാക്കുന്നതും മറ്റെന്തെങ്കിലും ഫീസ് ഈടാക്കുന്നതും നിയമപരമായി നിരോധിച്ചിട്ടുണ്ട്. റിക്രൂട്ട്മെന്റ് ഏജന്‍സികള്‍ വീട്ടുജോലിക്കാരോട് മനുഷ്യത്വപരമായ പെരുമാറ്റം കാഴള്ച വയ്ക്കണം. അവരെ അക്രമത്തിന് വിട്ടുകൊടുക്കരുത്. യുഎഇ സമൂഹത്തിന്റെ സംസ്‌കാരത്തെയും പാരമ്പര്യങ്ങളെയും കുറിച്ച് അവരെ ബോധവാന്മാരാക്കണം. എന്തെങ്കിലും പരാതികള്‍ ഉണ്ടെങ്കില്‍ എവിടെ പരാതിപ്പെടണം എന്നതിനെ കുറിച്ചുള്ള അറിവും അവര്‍ക്ക് നല്‍കണം. തൊഴില്‍ ദാതാവിന് വേണ്ടി മുഴുവന്‍ സമയ അടിസ്ഥാനത്തില്‍ ജോലി ചെയ്യുന്നിടത്തോളം കാലം തൊഴിലാളിക്ക് ഉചിതമായ താമസസൗകര്യം, ഭക്ഷണം വസ്ത്രം എന്നിവ നല്‍കാന്‍ തൊഴിലുടമയ്ക്ക് ബാധ്യതയുണ്ടായിരിക്കും.
തൊഴിലുടമകള്‍ കരാര്‍ വ്യവസ്ഥകള്‍ പൂര്‍ണമായി പാലിക്കണം
തൊഴിലുടമ വീട്ടുജോലിക്കാരനോട് ശരിയായ രീതിയില്‍ പെരുമാറുകയും അവരുടെ അന്തസ്സും ആരോഗ്യ സുരക്ഷയും കാത്തുസൂക്ഷിക്കുകയും, സമ്മതിച്ച തൊഴില്‍ കരാറിലെ വ്യവസ്ഥകള്‍, മന്ത്രാലയം പുറപ്പെടുവിച്ച പ്രമേയങ്ങള്‍ എന്നിവയുടെ അടിസ്ഥാനത്തില്‍ ശമ്പളം നല്‍കുകയും വേണം. തൊഴിലാളിക്കുള്ള ചികിത്സയോ ആരോഗ്യ ഇന്‍ഷുറന്‍സോ ലഭ്യമാക്കുകയും വേണം. ഗാര്‍ഹിക തൊഴിലാളിയെ മറ്റൊരാക്ക് കീഴില്‍ ജോലി ചെയ്യിക്കാനോ കരാറില്‍ പറഞ്ഞതല്ലാത്ത മറ്റു ജോലികള്‍ ചെയ്യിക്കാനോ പാടില്ല. അതേസമയം, സമാന സ്വഭാവമുള്ള ജോലിയാണെങ്കില്‍ തൊഴിലാളിയുടെ അനുവാദത്തോടെ അവ ചെയ്യിക്കുന്നതില്‍ തെറ്റില്ല. ഗാര്‍ഹിക തൊഴിലാളിക്ക് അവരുടെ വ്യക്തിഗത തിരിച്ചറിയല്‍ രേഖകള്‍ സൂക്ഷിക്കാനുള്ള അവകാശം നിയമം നല്‍കുന്നുണ്ട്. യുഎഇയില്‍ സേവനത്തിനിടെ മരിക്കുന്ന വീട്ടുജോലിക്കാരുടെ അനന്തരാവകാശികള്‍ക്ക് അവര്‍ അന്തരിച്ച മാസത്തെ ശമ്പളത്തോടൊപ്പം മറ്റ് ബാധകമായ കുടിശ്ശികയും അടയ്ക്കുന്നതിനുള്ള വ്യവസ്ഥകളും മാര്‍ഗ്ഗനിര്‍ദ്ദേശങ്ങളും ഇത് വ്യവസ്ഥ ചെയ്യുന്നു.
തൊഴിലാളിയുടെ ഉത്തരവാദിത്തങ്ങള്‍
തൊഴിലുടമയുടെ മാര്‍ഗ്ഗനിര്‍ദ്ദേശവും മേല്‍നോട്ടവും അനുസരിച്ചും തൊഴിലാളിയും ജോലി നിര്‍വഹിക്കണം എന്നതാണ് ഗാര്‍ഹിക തൊഴിലാളിയുടെ ഉത്തരവാദിത്തം. യുഎഇ സമൂഹത്തിന്റെ സംസ്‌കാരവും പാരമ്പര്യവും മാനിക്കുകയും പൊതു മര്യാദ പാലിക്കുകയും വേണം. അവര്‍ ജോലിസ്ഥലത്തെ സ്വകാര്യതയെ മാനിക്കുകയും, തൊഴിലുടമയുടെ സ്വത്ത്, ജോലി ഉപകരണങ്ങള്‍, അവരുടെ കസ്റ്റഡിയിലുള്ള എല്ലാ കാര്യങ്ങളും സംരക്ഷിക്കുകയും വേണം. തൊഴിലുടമയുടെ അനുമതിയില്ലാതെ മറ്റൊരു ജോലിയില്‍ ഏര്‍പ്പെടാന്‍ പാടില്ല. ഗാര്‍ഹിക തൊഴിലാളി വാര്‍ഷിക അവധിക്ക് അവരുടെ രാജ്യത്തേക്ക് പോകാന്‍ ആഗ്രഹിക്കുന്നുവെങ്കില്‍, രണ്ട് വര്‍ഷത്തിലൊരിക്കല്‍ യാത്രാക്കൂലിയുടെ മൂല്യം തൊഴിലുടമ വഹിക്കണം.