റോഡ് സുരക്ഷ ഉറപ്പുവരുത്തുക ലക്ഷ്യം
ഇവയുടെ സുരക്ഷിതമായ ഉപയോഗം ഉറപ്പുവരുത്തുകയും അവയുടെ സുരക്ഷാ മാനദണ്ഡങ്ങള്‍ അന്താരാഷ്ട്ര നിലവാരത്തിലേക്ക് ഉയര്‍ത്തുകയും ചെയ്യുന്നതിന്റെ ഭാഗമായാണ് നടപടിയെന്ന് മന്ത്രാലയം അറിയിച്ചു. രാജ്യത്ത് വ്യത്യസ്ത ഗതാഗത സംവിധാനങ്ങള്‍ നടപ്പിലാക്കുകയും അവയുടെ സമഗ്രമായ ഉപയോഗം സാധ്യമാക്കുകയും ചെയ്യുകയെന്ന ലക്ഷ്യത്തോടെയാണ് പുതിയ നിയമം കൊണ്ടുവന്നിരിക്കുന്നതെന്നും അധികൃതര്‍ വ്യക്തമാക്കി. സൈക്കിളുകള്‍ വാടകയ്ക്ക് നല്‍കുന്നവര്‍ക്കും വാടക സൈക്കിളുകള്‍ ഉപയോഗിക്കുന്നവര്‍ക്കും പുതിയ നിയമം ബാധകമാണ്. വ്യക്തികള്‍ക്കും കമ്പനികള്‍ക്കും ഇവ വാടകയ്‌ക്കോ അല്ലാതെയോ നല്‍കുന്നതും റോഡുകളിലോ നിര്‍ദിഷ്ട സൈക്കിള്‍ പാതകളിലോ ഇ സ്‌കൂട്ടറും സൈക്കിളും ഉപയോഗിക്കുന്നതും പുതിയ നിയമത്തിന്റെ പരിധിയില്‍ വരും. വ്യായാമം എന്ന നിലയ്ക്കും ബസ് സ്റ്റേഷനുകളിലും ഷോപ്പിംഗ് മാളുകളിലും ഹ്രസ്വദൂര യാത്രകള്‍ക്കായി നീക്കിവെച്ചിട്ടുള്ളതുമായ സൈക്കിളുകള്‍ക്കും നിയമം ബാധകമാവും.
പുതിയ നിയമത്തിലെ നിര്‍ദ്ദേശങ്ങള്‍ എന്തെല്ലാം?
സൈക്കിള്‍, സ്‌കൂട്ടര്‍, ഇലക്ട്രിക് ബൈക്ക് എന്നിവയില്‍ ഒരാള്‍ മാത്രമേ സഞ്ചരിക്കാവൂ. അതും ഇവയ്ക്കായി പ്രത്യേകം സജ്ജമാക്കിയ ലെയിനുകള്‍ ഉപയോഗിച്ച് മാത്രമേ ഇവയില്‍ യാത്ര ചെയ്യാവൂ. സുരക്ഷയുടെ ഭാഗമായുള്ള ഹെല്‍മറ്റ് അടക്കമുള്ള ഉപകരണങ്ങള്‍ ഉപയോഗിച്ചു വേണം ഇവ ഓടിക്കാന്‍. രാത്രി സമയങ്ങളില്‍ റിഫ്‌ളക്ഷനുണ്ടാവുന്ന വസ്ത്രം ധരിച്ച് മാത്രമേ ഓടിക്കാവൂ. പ്രത്യേക ലെയിനുകള്‍ ഇല്ലാത്ത പ്രദേശമാണെങ്കില്‍ മണിക്കൂറില്‍ 20 കിലോമീറ്റര്‍ വേഗതയുള്ള റോഡിന്റെ വലതു വശം ചേര്‍ന്ന് വേണം ഇവ ഓടിക്കാനെന്നും നിയമം അനുശാസിക്കുന്നു.
52d3bd06-823a-44f6-8dd0-e9b49c1cd1d8
സൈക്കിളുകള്‍ വാടകയ്ക്ക് കൊടുക്കുന്നവര്‍ ശ്രദ്ധിക്കാന്‍
സംയോജിത ഗതാഗത കേന്ദ്രത്തില്‍നിന്ന് പെര്‍മിറ്റ് എടുക്കാതെ സൈക്കിളുകളോ ഇലക്ട്രിക് സ്‌കൂട്ടറുകളോ വാടകക്ക് നല്‍കാന്‍ വ്യക്തികള്‍ക്കോ കമ്പനികള്‍ക്കോ അധികാരമില്ലെന്നും പുതിയ നിയമം അനുശാസിക്കുന്നു. നിര്‍ദ്ദിഷ്ട ഉപകരണങ്ങളുള്ളതും നിയമാനുസൃമായതുമായ വാഹനങ്ങള്‍ മാത്രമേ ഉപയോഗിക്കുന്നുള്ളൂ എന്ന് ഉറപ്പുവരുത്തേണ്ടത് വാടകയ്ക്ക് നല്‍കുന്നവരുടെ ഉത്തരവാദിത്തമാണ്. ഇവ കൃത്യമായ ഇടവേളകളില്‍ അറ്റകുറ്റപ്പണികള്‍ നടത്തി സുരക്ഷിതത്വം ഉറപ്പുവരുത്തണം. അത്യാവശ്യഘട്ടങ്ങളില്‍ വിളിക്കുന്നതിനുള്ള നമ്പര്‍ ഉപയോക്താക്കള്‍ക്ക് നല്‍കിയിരിക്കണം. ഇലക്ട്രിക് ബൈക്കുകളില്‍ നിയമം നിര്‍ദ്ദേശിക്കുന്ന രീതിയലുള്ള ജിപിഎസ് ഉപകരണം ഘടിപ്പിച്ചിരിക്കണം. രാത്രികാലങ്ങളില്‍ സൈക്കിളും ഇലക്ട്രിക് ബൈക്കും ഓടിക്കുമ്പോള്‍ മുന്നില്‍ വെള്ള ഹെഡ് ലൈറ്റും പിന്നില്‍ ചുവപ്പ് ലൈറ്റ് അല്ലെങ്കില്‍ ചുവന്ന റിഫ്‌ളക്ടര്‍ എന്നിവ ഉണ്ടായിരിക്കണം. ഹാന്‍ഡില്‍ ബാറില്‍ ഹോണ്‍ സംവിധാനം, മികച്ച ബ്രേക്ക് സംവിധാനം എന്നിവയും വേണം. നിയമലംഘകര്‍ക്കെതിരെ പിഴ ഉള്‍പ്പെടെയുള്ള ശിക്ഷ ചുമത്തുമെന്നും നിയമം വ്യക്തമാക്കുന്നുണ്ട്. പുതിയ നിയമത്തെ കുറിച്ച് ജനങ്ങളില്‍ അവബോധം സൃഷ്ടിക്കുന്നതിനായി ബോധവത്കരണ കാമ്പയിനുകളും സംഘടിപ്പിക്കുമെന്നും ഐടിസി അറിയിച്ചു.