ഫ്‌ളൈ ദുബായ് എയര്‍ലൈന്‍സില്‍ ഹൃദയാഘാതം മൂലം യാത്രക്കാരന്‍ മരിച്ചു; വിമാനം കറാച്ചിയിലേക്ക് തിരിച്ചുവിട്ടു

ദുബായ്: ദുബായില്‍ നിന്ന് ധാക്കയിലേക്കു പുറപ്പെട്ട ഫ്‌ളൈ ദുബായ് വിമാനത്തില്‍ വച്ച് യാത്രക്കാരന്‍ ഹൃദയാഘാതം മൂലം മരിച്ചു. സംഭവത്തെ തുടര്‍ന്ന് ധാക്ക എയര്‍പോര്‍ട്ടിലേക്ക് പോവാനിരുന്ന വിമാനം കറാച്ചിയിലേക്ക് തിരിച്ചുവിട്ടു. ഇന്നലെയാണ് സംഭവം. ഫെബ്രുവരി 18 ന് ശനിയാഴ്ച ദുബായില്‍ നിന്ന് ധാക്കയിലേക്കുള്ള എഫ്‌സെഡ് 523 ഫ്‌ളൈറ്റില്‍ വച്ചാണ് ദാരുണമായ സംഭവം ഉണ്ടായത്. 59കാരനായ ബംഗ്ലാദേശി പ്രവാസിയാണ് യാത്രയ്ക്കിടെ മരണപ്പെട്ടത്.

അന്തരിച്ച യാത്രക്കാരന്റെ കുടുംബത്തിന് ഫ്‌ളൈ ദുബായ് അഗാധമായ അനുശോചനം അറിയിക്കുന്നതായി എയര്‍ലൈന്‍ വക്താവ് പ്രസ്താവനയില്‍ പറഞ്ഞു. കുടുംബവുമായി ബന്ധപ്പെടാനുള്ള ശ്രമത്തിലാണെന്നും ഈ പ്രതിസന്ധി ഘട്ടത്തില്‍ കുടുംബത്തിനൊപ്പം തങ്ങളുമുണ്ടാവുമെന്നും കമ്പനി അധികൃതര്‍ അറിയിച്ചു.

Also Read: ‘എം പാസ്പോർട്ട് പൊലീസ് ആപ്’ പ്രവാസികൾക്ക് ആശ്വാസം; പാസ്പോർട്ട് വെരിഫിക്കേഷനുവേണ്ട സമയം മൂന്നിലൊന്നായി കുറയും

ദുബായ് ഇന്റര്‍നാഷണല്‍ വിമാനത്താവളത്തില്‍ നിന്ന് ധാക്ക എയര്‍പോര്‍ട്ടിലേക്ക് പുറപ്പെട്ടതായിരുന്നു വിമാനം. യാത്രാ മധ്യേ ബംഗ്ലാദേശി പൗരന് ഹൃദയാഘാതം അനുഭവപ്പെടുകയായിരുന്നു. ഉടന്‍ തന്നെ വിമാനം കറാച്ചി വിമാനത്താവളത്തില്‍ അടിയന്തര ചികില്‍സ ലഭ്യമാക്കുന്നതിനായി ഇറക്കിയെങ്കിലും ഫലമുണ്ടായില്ല.

Also Read: ഇന്നാഇലാഹി വഹിന്ന ഇലാഹി രാജിഹൂൻ, അജ്മാനിലെ മലയാളി പണ്ഡിതൻ ആര്‍ വി അലി മുസ്ലിയാര്‍ അന്തരിച്ചു

കറാച്ചി വിമാനത്താവളത്തില്‍ ലാന്‍ഡിംഗിന് ശേഷം നടത്തിയ പരിശോധനാ വേളയില്‍ തന്നെ പ്രവാസി മരിച്ചതായി സ്ഥിരീകരിച്ചതായി പാകിസ്താന്‍ മാധ്യമങ്ങള്‍ റിപ്പോര്‍ട്ട് ചെയ്തു. ഈ മാസം ആദ്യം, സിഡ്നിയില്‍ നിന്ന് ദുബായിലേക്കുള്ള എമിറേറ്റ്സ് വിമാനം മെഡിക്കല്‍ എമര്‍ജന്‍സി കാരണം പെര്‍ത്തിലേക്ക് വഴിതിരിച്ചുവിട്ടിരുന്നു. മറ്റൊരു സംഭവത്തില്‍, എയര്‍ലൈനിന്റെ ബ്രസ്സലിലേക്കുള്ള വിമാനം യാത്രാ മധ്യേ ഉണ്ടായ മെഡിക്കല്‍ എമര്‍ജന്‍സി കാരണം ഇറാഖി നഗരമായ എര്‍ബിലിലേക്ക് വഴിതിരിച്ചുവിടുകയുണ്ടായി.

Read Latest Gulf News and Malayalam News