തീരുമാനം ദുബായ് കിരീടാവകാശിയുടെ നിര്‍ദ്ദേശത്തെ തുടര്‍ന്ന്
രാജ്യത്തെ വാഹന പാര്‍ക്കിംഗുമായി ബന്ധപ്പെട്ട നിയമങ്ങളില്‍ കാലാനുസൃതമായ മാറ്റങ്ങള്‍ വരുത്താന്‍ ദുബായ് കിരീടാവകാശിയും ദുബായ് എക്സിക്യൂട്ടീവ് കൗണ്‍സില്‍ ചെയര്‍മാനുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം ബന്ധപ്പെട്ടവര്‍ക്ക് നിര്‍ദ്ദേശം നല്‍കിയിരുന്നു. ഇതേത്തുടര്‍ന്നാണ് നടപടി. ഇനി മുതല്‍ ഞായറാഴ്ചകളിലും മറ്റ് പൊതു അവധി ദിനങ്ങളിലും ദുബായില്‍ വാഹന പാര്‍ക്കിങ് സൗജന്യമായിരിക്കും. തിങ്കള്‍ മുതല്‍ ശനി വരെയുളള ദിവസങ്ങളില്‍ രാവിലെ എട്ടു മുതല്‍ വൈകിട്ട് 10 വരെയുള്ള 14 മണിക്കൂര്‍ വാഹന പാര്‍ക്കിങിനു പണം അടയ്ക്കണമെന്നാണ് പുതിയ വ്യവസ്ഥ.
തുടര്‍ച്ചയായി പാര്‍ക്ക് ചെയ്യാവുന്ന സമയത്തിലും മാറ്റം
അതേസമയം, ബഹുനില പാര്‍ക്കിംഗ് സൗകര്യങ്ങളില്‍ ആഴ്ചയില്‍ എല്ലാ ദിവസവും 24 മണിക്കൂറും പാര്‍ക്കിംഗിന് ഫീസ് ഈടാക്കും. പണം അടച്ചായാലും സൗജന്യമാണെങ്കിലും റോഡ് അരികുകളിലുള്ള പാര്‍ക്കിംഗ് ഏരിയകളില്‍ തുടര്‍ച്ചയായി നാലു മണിക്കൂര്‍ മാത്രമേ പാര്‍ക്കിംഗ് പാടുള്ളൂ എന്നും പുതിയ ചട്ടങ്ങളില്‍ പറയുന്നു. ഇതില്‍ കൂടുതല്‍ സമയം പാര്‍ക്ക് ചെയ്യുന്നത് നിയമവിരുദ്ധമാകും. അതേസമയം, റോഡ് സൈഡിലുള്ളവ അല്ലാത്ത മറ്റ് പാര്‍ക്കിംഗ് സ്ലോട്ടുകളില്‍ 24 മണിക്കൂര്‍ വരെ ഫീസ് നല്‍കി വാഹനങ്ങള്‍ പാര്‍ക്ക് ചെയ്യാം. ബഹുനില കെട്ടിടങ്ങളിലെ പാര്‍ക്കിംഗ് ഏരിയകളില്‍ 30 ദിവസത്തില്‍ കൂടുതല്‍ വാഹനങ്ങള്‍ പാര്‍ക്ക് ചെയ്യരുതെന്നും അധികൃതര്‍ വ്യക്തമാക്കി.
ഉത്തരവ് ഗസറ്റില്‍ വരുന്നതോടെ പ്രാബല്യത്തിലാവും
ദുബായ് കിരീടാവകാശി നല്‍കിയ നിര്‍ദ്ദേശത്തിന്റെ അടിസ്ഥാനത്തില്‍ റോഡ്‌സ് ആന്റ് ട്രാന്‍സ്‌പോര്‍ട്ട് അതോറിറ്റി ഡയരക്ടര്‍ ജനറലാണ് പുതിയ പാര്‍ക്കിംഗ് നിയമങ്ങള്‍ പ്രഖ്യാപിച്ചത്. പുതിയ ഉത്തരവ് ഗസറ്റില്‍ പ്രസിദ്ധീകരിക്കപ്പെടുന്ന തീയതി മുതല്‍ അവ പ്രാബല്യത്തില്‍ വരുമെന്നും അധികൃതര്‍ അറിയിച്ചു. ഈ വര്‍ഷം ജനുവരി ഒന്നു മുതല്‍ യുഎയിലെ അവധി ദിനം വെള്ളിയാഴ്ചയില്‍ നിന്ന് ഞായറാഴ്ചയിലേക്ക് മാറ്റിയിരുന്നു. എന്നാല്‍ സൗജന്യ പാര്‍ക്കിംഗിന്റെ കാര്യത്തില്‍ വെള്ളിയാഴ്ച തന്നെ തുടരാനാണ് അധികൃതര്‍ തീരുമാനിച്ചത്. എന്നാല്‍ പുതിയ തീരുമാനത്തോടെ അവധി ദിനമായ ഞായറാഴ്ച തന്നെ സൗജന്യ പാര്‍ക്കിംഗും ലഭിക്കും.