ദുബായ്: പ്രവാചകന് മുഹമ്മദ് നബിയുടെ 1495-ആം ജന്മദിനമാണ് നാളെ. സ്നേഹത്തിന്റെയും സാഹോദര്യത്തിന്റെയും ദൂതനായി ഭൂമിയിലേക്ക് എത്തിയ മുഹമ്മദ് നബിയുടെ സന്ദേശങ്ങള് ജീവിതത്തില് പകര്ത്താനുള്ള തീരുമാനം എടുക്കുന്ന ദിവസമാണ് നബിദിനം. ഒക്ടോബർ 29 വ്യാഴാഴ്ച്ച നബിദിനം ആഘോഷിക്കുന്നതിന്റെ ഭാഗമായി അന്ന് ദുബായിലെ എല്ലാ പൊതുസ്ഥലങ്ങളിലും സൗജന്യ പാർക്കിംഗ് അനുവദിക്കുമെന്ന് യുഎഇ റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ) പ്രഖ്യാപിച്ചു.
ദുബായ് മെട്രോ, ദുബായ് ട്രാം, പബ്ലിക് ബസുകൾ, സമുദ്ര ഗതാഗതം, എന്നിവിടങ്ങളിലെ പ്രവര്ത്തന സമയവും ആർടിഎ പ്രഖ്യാപിച്ചു. ദുബായ് മെട്രോയുടെ റെഡ് ലൈൻ രാവിലെ 5 മുതൽ പുലർച്ചെ 1 വരെയും ഗ്രീൻ ലൈൻ രാവിലെ 5.30 മുതൽ പുലർച്ചെ 1 വരെയും പ്രവർത്തിക്കും. രാവിലെ 6 മുതൽ പുലർച്ചെ 1 വരെയായിരിക്കും ദുബായ് ട്രാം പ്രവർത്തിക്കുക.
Also Read: പ്രവാസികളുടെ 'പണി പോകും'; ധാരണപത്രം ഒപ്പുവച്ച് സൗദി, സ്വദേശിവൽക്കരണം ശക്തമാക്കാൻ രാജ്യം
പൊതു ബസുകളുടെ സേവന സമയം ഇങ്ങനെ: പ്രധാന സ്റ്റേഷനുകൾ ആയ ഗോൾഡ് സൂക്ക് സ്റ്റേഷൻ പുലർച്ചെ 4.25 മുതൽ അർദ്ധരാത്രി 12:29 വരെ പ്രവർത്തിക്കും. അൽ-ഗുബൈബ സ്റ്റേഷൻ പുലർച്ചെ 4.14 മുതൽ അർദ്ധരാത്രി 12:58 വരെ പ്രവര്ത്തിക്കും. റൂട്ട് സി 01 ഒഴികെയുള്ള സബ് സ്റ്റേഷനുകൾ രാവിലെ 4.45 മുതൽ രാത്രി 11:00 വരെ ഉണ്ടായിരിക്കും.
അൽ-ഖുസൈസ് സ്റ്റേഷൻ പുലർച്ചെ 4.31 മുതൽ അർദ്ധരാത്രി 12:08 വരെ പ്രവര്ത്തിക്കും. അൽ ക്വോസ് ഇൻഡസ്ട്രിയൽ സ്റ്റേഷൻ രാവിലെ 05:05 മുതൽ രാത്രി 11:35 വരെയും ജെബൽ അലി സ്റ്റേഷൻ രാവിലെ 4.58 മുതൽ രാത്രി 11.30 വരെയും പ്രവര്ത്തിക്കും എന്ന് യുഎഇ റോഡ്സ് ആൻഡ് ട്രാൻസ്പോർട്ട് അതോറിറ്റി അറിയിച്ചു.