ഷാർജ: ഷാർജ എമിറേറ്റിൽ ഏർപ്പെടുത്തിയ അത്യാധുനിക സുരക്ഷാ സംവിധാനങ്ങൾ കുറ്റക്യത്യങ്ങളുടെ എണ്ണം കുറയുന്നതിന് സഹായകരമായതായി ഷാർജാ പോലീസ് മേധാവി മേജർ ജനറൽ സൈഫ് അൽ സആരി അൽ ശംസി വ്യക്തമാക്കി. ഷാർജാ പോലീസ് ആസ്ഥാനത്ത് നടന്ന ഏഴാമത് വാർഷിക മീഡിയാ ഫോറത്തിൽ സംസാരിക്കുകയായിരുന്നു അദ്ദേഹം. കുറ്റക്യത്യങ്ങൾ പരമാവധി തടഞ്ഞ് കൊണ്ട് ഷാർജ എമിറേറ്റിനേയും യുഎഇ എന്ന രാജ്യത്തേയും സുരക്ഷയിൽ ഒന്നാം സ്ഥാനത്ത് എത്തിക്കുക എന്ന ലക്ഷ്യത്തോടെയാണ് പോലീസ് സംവിധാനങ്ങൾ പ്രവർത്തിക്കുന്നതെന്നും അദ്ദേഹം പറഞ്ഞു.
'മാധ്യമങ്ങളുടെ പങ്ക് വലുത്'
സുരക്ഷയെ കുറിച്ചുള്ള വിവിധ തരത്തിലുള്ള ബോധവത്കരണമാണ് ജനങ്ങൾക്കിടയിൽ നിരന്തരം പോലീസ് സംഘടിപ്പിക്കാറുള്ളത്. ഇതിൽ മാധ്യമങ്ങളുടെ പങ്ക് ഏറെ വലുതാണ്. പൊതുജനങ്ങളോടപ്പം മാധ്യമങ്ങളും പോലീസിനെ സഹായിക്കാൻ മുന്നിട്ടറങ്ങിയത് അഭിനന്ദനാർഹമാണെന്ന് മേജർ വ്യക്തമാക്കി. പോലീസ് മുന്നറിയിപ്പുകളും, മുൻകരുതലുകളും ജനങ്ങളിലേക്ക് എളുപ്പത്തിൽ എത്തിക്കുന്നതിൽ രാജ്യത്ത് പ്രവർത്തിക്കുന്ന ആഭ്യന്തര-അന്താരഷ്ട്ര മാധ്യമങ്ങളുടെ ജാഗ്രതയും അദ്ദേഹം പ്രത്യേകം പരാമർശിച്ചു.
'സംഘടിത കുറ്റക്യത്യങ്ങൾ തടയാനാകുന്നത് ഏറ്റവും നല്ല സംവിധാനങ്ങൾക്ക് മാത്രം'
ചടങ്ങിൽ പങ്കെടുത്ത മാധ്യമ പ്രതിനിധികൾക്കുള്ള സ്നേഹോപഹാരവും അദ്ദേഹം കൈമാറി. വിവിധ മേഖലകളിലെ പോലീസിന്റെ പ്രവർത്തന മികവുകളെ കുറിച്ചുള്ള വിശദീകരണവും ചടങ്ങിൽ സംഘടിപ്പിച്ചിരുന്നു. ആധുനിക കാലഘട്ടത്തിൽ സംഘടിത കുറ്റക്യത്യങ്ങൾ തടയാൻ ഏറ്റവും നല്ല സംവിധാനങ്ങൾക്ക് മാത്രമേ സാധിക്കുകയുള്ളുവെന്നും അത്തരത്തിൽ മികവുറ്റ പ്രവർത്തനങ്ങൾ കാഴ്ചവെച്ച പോലീസ് സ്റ്റേഷനുകൾക്ക് ഫെഡറൽ ഗവൺമെന്റിൽ നിന്നുള്ള പ്രത്യേക അംഗീകാരങ്ങൾ ലഭിച്ചതിനെ കുറിച്ചും ചടങ്ങിൽ വിശദീകരിച്ചു.
കുറ്റക്യത്യങ്ങൾ ഗണ്യമായി കുറഞ്ഞു
വ്യവസായ മേഖലകൾ കേന്ദ്രീകരിച്ചുള്ള കുറ്റക്യത്യങ്ങൾ ഗണ്യമായി കുറഞ്ഞിട്ടുണ്ട്. സൈബർ, മയക്കുമരുന്ന്, ബ്ലാക്ക് മെയിലിങ് തുടങ്ങി വിവിധ കുറ്റക്യത്യങ്ങളിലും മുൻ വർഷങ്ങളെ അപേക്ഷിച്ച് കുറവു രേഖപ്പെടുത്തിയിട്ടുണ്ട്. എമിറേറ്റിലെ വിവിധ ഇടങ്ങളിൽ പുതുതായി ഘടിപ്പിച്ചിട്ടുള്ള അത്യാധുനിക സുരക്ഷാ കാമറകളും അതിന്റെ പ്രവർത്തന രീതികളെ കുറിച്ചും പോലീസിലെ വിദഗ്ധർ മാധ്യമ പ്രവർത്തകർക്ക് മുന്നിൽ വിശദീകരിച്ചു. സുസ്ഥിര വികസനം പ്രോത്സാഹിപ്പിക്കുന്നതിൽ മാധ്യമങ്ങളുടെ പങ്ക് എന്ന തലക്കെട്ടിലാണ് ഈ വർഷത്തെ മീഡിയാ ഫോറം സംഘടിപ്പിച്ചത്.