വരവേല്‍ക്കാന്‍ പ്രധാനമന്ത്രിയും
Photo Credit :wam
ആദ്യ വിമാനത്തെ വരവേല്‍ക്കാന്‍ ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു വിമാനത്താവളത്തിലെത്തിയിരുന്നു. ഇനിയും ഒരു പാട് വിമാനങ്ങള്‍ ഇരു രാജ്യങ്ങള്‍ക്കുമിടയില്‍ പറക്കുമെങ്കിലും ആദ്യത്തെ പറക്കല്‍ ഒരു വട്ടം മാത്രമേ സംഭവിക്കൂ എന്ന് അദ്ദേഹം പറഞ്ഞു. അതുകൊണ്ടു തന്നെ ദുബായില്‍ നിന്ന് ഇസ്രായേലിലേക്കുള്ള ആദ്യ യാത്രാവിമാനം എന്ന നിലയ്ക്ക് ചരിത്രപരമായ പ്രാധാന്യം ഈ വിമാനത്തിനുണ്ടെന്നും അദ്ദേഹം കൂട്ടിച്ചേര്‍ത്തു.
വിമാനം പറന്നത് പുതിയ കാലത്തിലേക്ക്
Photo Credit :wam
ദുബായില്‍ നിന്നുള്ള വിമാനം പരസ്പര സഹകരണത്തിന്റെ പുതിയ കാലഘട്ടത്തിലേക്കാണ് പറന്നിറങ്ങിയിരിക്കുന്നതെന്ന് നെതന്യാഹു വിശേഷിപ്പിച്ചു. ഇത് ചരിത്രപരമായ നിമിഷമാണ്. ഇതിലൂടെ ചരിത്രത്തെ മാറ്റിയെഴുതിയിരിക്കുകയാണ് നാം. മാറ്റം ആഗ്രഹിക്കുന്ന പുതുതലമുറയ്ക്ക് നമുക്ക് നല്‍കാനുള്ള സന്ദേശമാണിത്. മിഡിലീസ്റ്റില്‍ പുതിയ മാറ്റത്തിന്റെ തുടക്കമാണിതെന്നും അദ്ദേഹം പറഞ്ഞു.
ആദ്യം പറന്നത് വിനോദ സഞ്ചാരികള്‍
Photo Credit :wam
ദുബായില്‍ നിന്നുള്ള ആദ്യ വിമാനത്തില്‍ യാത്ര ചെയ്തവരിലേറെയും വിനോദ സഞ്ചാരികളായിരുന്നു. ദുബായില്‍ നിന്ന് നാട്ടിലേക്ക് മടങ്ങുന്ന ഏതാനും ഇസ്രായേലി പൗരന്‍മാരും വിമാനത്തിലുണ്ടായിരുന്നു. ദിവസം രണ്ട് തവണയാണ് ഫ്‌ളൈദുബായ് വിമാനം തെല്‍ അവീവിലേക്ക് സര്‍വീസ് നടത്തുക. ഇരു രാജ്യങ്ങളിലെയും പൗരന്‍മാര്‍ക്ക് വിസയില്ലാതെ യാത്ര ചെയ്യാമെന്ന സൗകര്യവുമുണ്ട്.
കൂടുതല്‍ വിമാനങ്ങള്‍ ഉടന്‍
Photo Credit :wam
യുഎഇയില്‍ നിന്ന് ഇസ്രായേലിലേക്കും തിരിച്ചും സര്‍വീസ് നടത്താന്‍ കൂടുതല്‍ വിമാനക്കമ്പനികള്‍ രംഗത്തെത്തിയിട്ടുണ്ട്. ഇസ്രായേലി വിമാനത്തമ്പനികളായ എല്‍ അല്‍, ഇസ്രയര്‍ എന്നിവ അടുത്ത മാസം യുഎഇ സര്‍വീസുകള്‍ തുടങ്ങുമെന്ന് അറിയിച്ചിട്ടുണ്ട്. അബൂദാബിയില്‍ നിന്നുള്ള ഇത്തിഹാദ് എയര്‍വെയ്‌സ് അടുത്ത മാര്‍ച്ചോടെ തെല്‍ അവീവ് സര്‍വീസ് തുടങ്ങും.