ദുബായ്: 51ാമത് യുഎഇ ദേശീയ ദിനത്തോടനുബന്ധിച്ച് സെൻട്രൽ ബാങ്ക് ഓഫ് യുഎഇ 1000 ദിർഹത്തിന്റെ പുതിയ നോട്ട് പുറത്തിറക്കി. പോളിമർ ഉപയോഗിച്ചാണ് നോട്ട് നിർമ്മിച്ചിരിക്കുന്നത്, പുതിയ ഡിസൈനുകളും നൂതന സുരക്ഷാ ഫീച്ചറുകളും ഉപയോഗിച്ചിരിക്കുന്നതായും അധികൃതർ അറിയിച്ചു. മുൻ പ്രസിഡന്റും യുഎഇ സ്ഥാപകനുമായ ശെയ്ഖ് സായിദ് ബിൻ സുൽത്താൻ അൽ നഹ്യാനെയാണ് നോട്ടിന്റെ മുൻവശത്ത് ചിത്രീകരിച്ചിരിക്കുന്നത്. ഒരു ബഹിരാകാശ വാഹനത്തിന്റെ തൊട്ടടുത്താണ് ചിത്രം സ്ഥിതി ചെയ്യുന്നത്. 1976-ൽ ശെയ്ഖ് സായിദും നാസയുടെ പയനിയർമാരും തമ്മിലുള്ള കൂടിക്കാഴ്ചയിൽ നിന്ന് പ്രചോദനം ഉൾക്കൊണ്ടതാണ് ഈ രൂപകൽപ്പനയെന്ന് സെൻട്രൽ ബാങ്ക് അധികൃതർ അറിയിച്ചു. ബഹിരാകാശ പര്യവേഷണത്തിന്റെ കാര്യത്തിൽ യുഎഇയെ മുൻനിരയിൽ എത്തിക്കാാനുള്ള രാഷ്ട്ര സ്ഥാപകന്റെ അഭിലാഷങ്ങളുടെ പ്രകടനമാണ് ഇതിലൂടെ വ്യക്തമാക്കപ്പെടുന്നത്. ശെയ്ഖ് സായിദിന്റെ ചിത്രത്തിന് ഇടതുവശത്ത് 2021-ൽ നടത്തിയ യാത്രയെ പരാമർശിക്കുന്ന 'എമിറേറ്റ്സ് മിഷൻ ടു എക്സ്പ്ലോർ മാർസ് - ദി ഹോപ്പ് പ്രോബ്' എന്ന വാക്കുകളും ആലേഖനം ചെയ്തിട്ടുണ്ട്.
'പൗരന്മാരെ കരുതലോടെ സംരക്ഷിക്കുകയും വികസനം, സർഗ്ഗാത്മകത, വളർച്ചയുടെയും എല്ലാ വഴികളും അവർക്ക് മുന്നിൽ തുറന്നിടുകയും ചെയ്യുന്നതിനാണ് രാജ്യം മുൻഗണന നൽകുന്നത്. അത് എന്നും അങ്ങനെ തന്നെ തുടരുകയും ചെയ്യും. ഈ ലക്ഷ്യം കൈവരിക്കാനുള്ള ദൗത്യത്തിൽ ഒരു അവസരവും രാജ്യം പാഴാക്കുകയില്ലെന്നും ശെയ്ഖ് മുഹമ്മദ് പറഞ്ഞു. മാനവികതയുടെ പുരോഗതിയും വികസനവും കൊണ്ടുവരുന്ന എല്ലാറ്റിന്റെയും പ്രധാന പങ്കാളിയും സഹായിയുമായി യുഎഇ നിലനിൽക്കും. കാലാവസ്ഥാ വ്യതിയാനം, ഭക്ഷ്യസുരക്ഷ, പകർച്ചവ്യാധികൾ, ദാരിദ്ര്യം തുടങ്ങിയ വെല്ലുവിളികളെ നേരിടുന്ന കാര്യത്തിൽ ലോകരാജ്യങ്ങൾക്കുള്ള പിന്തുണ ശക്തിപ്പെടുത്തുമെന്നും അദ്ദേഹം പറഞ്ഞു.
Read Latest Gulf Newsand Malayalam News