കിടിലന്‍ ഓഫറുമായി യുഎഇ; സന്ദര്‍ശകരുടെ ടൂറിസ്റ്റ് വിസ കാലാവധി ഒരു മാസത്തേക്ക് നീട്ടി

ദുബായ്: നിലവില്‍ യുഎഇയില്‍ സന്ദര്‍ശനത്തിനെത്തിയ വിദേശികള്‍ക്ക് ആശ്വാസമാകുന്ന തീരുമാനവുമായി ഭരണകൂടം. ടൂറിസ്റ്റ് വിസയുടെ കാലാവധി ഒരു മാസത്തേക്ക് സൗജന്യമായി നീട്ടിനല്‍കാന്‍ യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശെയ്ഖ് മുഹമ്മദ് ബിന്‍ റാശിദ് അല്‍ മക്തൂം ഉത്തരവിട്ടു.

യൂറോപ്യന്‍ രാജ്യങ്ങളില്‍ പുതിയ കൊവിഡ് വൈറസ് റിപ്പോര്‍ട്ട് ചെയ്യപ്പെട്ട പശ്ചാത്തലത്തില്‍ പല രാജ്യങ്ങളും വിമാന സര്‍വീസുകള്‍ റദ്ദാക്കിയ സാഹചര്യത്തിലാണ് തീരുമാനം. ഇതുപ്രകാരം നിലവില്‍ ടൂറിസ്റ്റ് വിസയില്‍ യുഎഇയിലെത്തിയവര്‍ക്ക് ഒരു മാസം കൂടി അധിക ഫീസ് നല്‍കാതെ രാജ്യത്ത് തങ്ങാനാവും.

Also Read: നിയമം ലംഘിച്ച് വാഹനമോടിക്കുന്നവരെ കണ്ടെത്താന്‍ റഡാറുമായി അബുദാബി; ആരൊക്കെ കുടുങ്ങും?

സന്ദര്‍ശകര്‍ക്ക് ഇത്തവണത്തെ പുതുവല്‍സരം യുഎഇയില്‍ വെച്ച് ആഘോഷിക്കാനുള്ള അവസരമാണ് ദുബായ് ഭരണാധികാരിയുടെ അവസരോചിതവും മനുഷ്യസ്‌നേഹപരുമായ തീരുമാനത്തിലൂടെ കൈവന്നിരിക്കുന്നതെന്ന് ജനറല്‍ ഡയരക്ടറേറ്റ് ഓഫ് റസിഡന്‍സി ആന്റ് ഫോറിന്‍ അഫയേഴ്‌സ് ഡയരക്ടര്‍ ജനറല്‍ മേജര്‍ ജനറല്‍ മുഹമ്മദ് അല്‍ മര്‍രി അഭിപ്രായപ്പെട്ടു. ഈ നടപടിക്ക് ദുബായ് ഭരണാധികാരിയോട് നന്ദി പറഞ്ഞ അദ്ദേഹം, സന്ദര്‍ശകരുടെ ആരോഗ്യ സുരക്ഷയ്ക്ക് ആവശ്യമായ എല്ലാ മുന്‍കരുതലുകളും യുഎഇ ഭരണകൂടം കൈക്കൊണ്ടിട്ടുണ്ടെന്നും അറിയിച്ചു.