ഗുജറാത്തിൽ സ്വാതന്ത്ര്യദിനത്തോടെ ടോൾ പിൻവലിക്കും

ഗാന്ധിനഗർ: ഓഗസ്റ് 15 മുതൽ സ്വകാര്യ കാറുകൾക്കും ചെറുവാഹനങ്ങൾക്കും ഗുജറാത്തിൽ ടോൾ ഈടാക്കില്ലെന്ന് മുഖ്യമന്ത്രി ആനന്ദിബെൻ പട്ടേൽ. ട്വിറ്ററിലൂടെയാണ് മുഖ്യമന്ത്രി ഈ വിവരം ജനങ്ങളുമായി പങ്കുവെച്ചത്.

തൊഴിലുമായി ബന്ധപ്പെട്ട് ധാരാളം ജനങ്ങൾ ദിവസേന കാറിൽ സഞ്ചരിക്കുന്നു.ഓരോരുത്തർക്കും ദിനംപ്രതി ടോൾ നൽകുന്നതിലൂടെ 100 മുതൽ 150 രൂപ വരെ ചെലവാകുന്നു. മധ്യവർഗ കുടുംബങ്ങൾക്ക് ഇത് ഏറെ ബുദ്ധിമുട്ടുണ്ടാക്കും.അതിനാൽ സർക്കാർ അവരെ ഈ ബാധ്യതയിൽ നിന്ന് ഒഴിവാക്കാൻ തീരുമാനിച്ചു. മുഖ്യമന്ത്രി കഴിഞ്ഞ ദിവസം ഒരു പൊതു വേദിയിൽ ഇങ്ങനെ പ്രസ്താവിച്ചതിനെ തുടർന്നാണ് ഔദ്യോഗിക നടപടി ഉണ്ടായത്.

രാജ്യത്തെ പ്രധാന വ്യാവസായിക കേന്ദ്രങ്ങളിൽ ഒന്നായ ഗുജറാത്തിൽ 50 ഓളം പ്രധാന ടോൾ ബൂത്തുകളാണ് ഉള്ളത്. ഈ ടോൾ ഇളവ് പ്രതിവർഷം 80 മുതൽ 100 കോടി രൂപ വരെ സർക്കാരിന് നികുതി നഷ്ടമുണ്ടാക്കുമെന്നാണ് കണക്ക്.