അഭിമാനപൂരിതം: രാജ്യത്തിനിത് എഴുപത്തിരണ്ടാം ഓര്‍മ്മ ദിനം

കനത്ത സുരക്ഷയില്‍ രാജ്യം ഇന്ന് എഴുപത്തിരണ്ടാം സ്വാതന്ത്ര്യദിനം ആഘോഷിക്കുകയാണ്. പ്രധാനമന്ത്രി നരേന്ദ്രമോദിയുടെ അഞ്ചാമത്തെ സ്വാതന്ത്ര്യ ദിന പ്രസംഗമാണ് ഇന്ന് ചെങ്കോട്ടയില്‍ നടക്കുന്നത്. ഭീകരാക്രമണ ഭീഷണിയുടെ പശ്ചാത്തലത്തില്‍ കര്‍ശന സുരക്ഷയിലാണ് രാജ്യം സ്വാതന്ത്ര്യദിന ആഘോഷങ്ങളിലേയ്ക്ക് കടക്കുന്നത്.

ഡല്‍ഹി മെട്രോ സ്റ്റേഷനും കടുത്ത സുരക്ഷയിലാണ് ഇക്കുറി സജ്ജീകരിച്ചിരിക്കുന്നത്. ഇവിടെ പാര്‍ക്കിംഗ് സൗകാര്യങ്ങള്‍ പൂര്‍ണ്ണമായും നിര്‍ത്തലാക്കി. വിമാനത്താവളങ്ങളിലും റെയില്‍വേ സ്റ്റേഷനുകളിലുമടക്കം എല്ലാ പ്രധാന കേന്ദ്രങ്ങളിലും പോലീസ്, അര്‍ദ്ധ സൈനിക വിഭാഗങ്ങളുടെ പരിശോധനകള്‍ പൂര്‍ത്തിയാക്കി. പ്രധാനമന്ത്രിയുടെ സ്വാതന്ത്ര്യ ദിന പ്രസംഗം നടക്കുന്ന ചെങ്കോട്ട അടക്കമുള്ള പ്രധാന സ്ഥലങ്ങളിലെല്ലാം പഴുതടച്ച സുരക്ഷയാണ് ക്രമീകരിച്ചിരിക്കുന്നത്.

ചരിത്രത്തിലെ നിർണായക ഘട്ടത്തിലൂടെയാണ് നാം കടന്നുപോവുന്നതെന്നും ലക്ഷ്യത്തിലെത്തിച്ചേരാന്‍ അലസത വെടിഞ്ഞ് മനസ്സുറപ്പോടെ മുന്നോട്ടുപോകണമെന്നും ഇന്നലെ രാഷ്ട്രപതി രാംനാഥ് കോവിന്ദ്‌ സ്വാതന്ത്ര്യ ദിന സന്ദേശത്തില്‍ പറഞ്ഞു. ഇന്ത്യന്‍ സമൂഹത്തില്‍ ഹിംസയ്ക്ക് സ്ഥാനമില്ല. ഗാന്ധിയന്‍ ആശയങ്ങള്‍ മുറുകെപ്പിടിക്കണം. എല്ലാവര്‍ക്കും വൈദ്യുതി, വെളിയിട വിസര്‍ജന വിമുക്ത രാജ്യം, എല്ലാവര്‍ക്കും പാര്‍പ്പിടം, ദാരിദ്ര്യ നിര്‍മാര്‍ജനം തുടങ്ങിയ ലക്ഷ്യങ്ങള്‍ ഉടന്‍ തന്നെ രാജ്യം കൈവരിക്കുമെന്നും രാഷ്‌ട്രപതി പറഞ്ഞു.