പൊതുമേഖലാ ബാങ്കുകളിൽ സ്പെഷ്യലിസ്റ്റ് ഓഫീസര്‍ തസ്തികകളിലെ നിയമനത്തിനായി ഇൻസ്റ്റിറ്റ്യൂട്ട് ഓഫ് ബാങ്കിങ് പേഴ്സനൽ സിലക്ഷൻ നടത്തിയ പ്രിലിമിനറി പരീക്ഷയുട ഫലം പ്രസിദ്ധീകരിച്ചു. 1163 പോസ്റ്റുകളിലേക്കായി ഡിസംബര്‍ 28, 29 തീയതികളിലായാണ് പ്രിലിമിനറി പരീക്ഷ നടന്നത്.

ജനുവരി 25നാണ് മെയിൽ പരീക്ഷ. മെയിൻ പരീക്ഷയിൽ വിജയിക്കുന്നവര്‍ക്ക് അഭിമുഖം ഉണ്ടാവും.
17 പൊതുമേഖലാ ബാങ്കുകൾ ഐബിപിഎസ് നിയമന രീതിയാണ് സ്വീകരിച്ചിരിക്കുന്നത്. പൊതു എഴുത്ത് പരീക്ഷ, പൊതു അഭിമുഖം, പ്രൊവിഷനൽ അലോട്ട്മെൻ്റ് എന്നീ ഘട്ടങ്ങളിലൂടെയാണ് തിരഞ്ഞെടുത്ത പൊതുമേഖലാ ബാങ്കുകളിലെ സ്പെഷ്യലിസ്റ്റ് ഓഫീസര്‍ തസ്തികയിലേക്കുള്ള ഐബിപിഎസിൻ്റെ കോമൺ റിക്രൂട്ട്മെൻ്റ് പ്രോസസ്. പൊതു പരീക്ഷയിൽ നേടുന്ന സ്കോറിൻ്റെ അടിസ്ഥാനത്തിലാവും പ്രാഥമിക തിരഞ്ഞെടുപ്പ്.

2021 മാര്‍ച്ച് 31 വരെയാണ് ഉദ്യോഗാര്‍ഥികൾക്ക് നിയമനത്തിന് അവസരമുള്ളത്. 20നും 30നും മധ്യേ പ്രായമുള്ളവര്‍ക്കാണ് പരീക്ഷ എഴുതാൻ അവസരമുള്ളത്. ഉയര്‍ന്ന പ്രായപരിധിയിൽ പട്ടികവിഭാഗക്കാര്‍ക്ക് അഞ്ചും ഒബിസിക്ക് മൂന്നും വികലാംഗര്‍ക്ക് പത്തും വര്‍ഷം ഇളവ് ലഭിക്കും. ഏതെങ്കിലും ഒരു തസ്തികയിലേക്ക് മാത്രമാണ് ഉദ്യോഗാര്‍ഥികൾക്ക് അപേക്ഷിക്കാൻ കഴിയുന്നത്.

ഡിസംബര്‍ 28, 29 തീയതികളിലായാണ് ഓൺലൈൻ പരീക്ഷകൾ നടന്നത്. ലോ ഓഫീസര്‍, രാജ്ഭാഷാ അധികാരി തസ്തികകളിൽ റീസണിങ്, ഇംഗ്ലീഷ് ലാംഗ്വേജ്, ജനറൽ അവയര്‍നെസ് എന്നീ വിഷയങ്ങളിൽ നിന്നുള്ള ചോദ്യങ്ങളും മറ്റ് തസ്തികകളിൽ റീസണിങ്, ഇംഗ്ലീഷ് ലാംഗ്വേജ്, ക്വാണ്ടിറ്റേറ്റീവ് ആപ്റ്റിറ്റ്യൂഡ് എന്നീ വിഷയങ്ങളിൽ നിന്നുള്ള ചോദ്യങ്ങളുമാണ് പൊതുവേ ഉണ്ടാവുന്നത്. മെയിൻ പരീക്ഷ ജനുവരി 25ന് നടക്കും.

സംസ്ഥാനത്തെ 10 നഗരങ്ങളുൾപ്പെടെ രാജ്യത്തെ ഇരുന്നൂറിലേറെ കേന്ദ്രങ്ങളിലായാണ് ഓൺലൈൻ പരീക്ഷ നടന്നത്. കേരളത്തിൽ കണ്ണൂര്‍, കൊച്ചി, കോട്ടയം, കോഴിക്കോട്, തൃശൂര്‍, തിരുവനന്തപുരം, മലപ്പുറം, പാലക്കാട്, ആലപ്പുഴ എന്നിവടങ്ങളിലാണ് പരീക്ഷ നടന്നത്. മെയിൻ പരീക്ഷക്ക് കൊച്ചിയിലും തിരുവനന്തപുരത്തും കേന്ദ്രങ്ങളുണ്ടാവും. പ്രിലിമിനറി പരീക്ഷക്ക് 150 ചോദ്യങ്ങളാണ് ഉണ്ടായിരുന്നത്. ഇംഗ്ലീഷിലും ഹിന്ദിയിലുമായി നടന്ന പരീക്ഷ 45 മിനിറ്റായിരുന്നു.

പരീക്ഷാഫലം അറിയാൻ

1. ഐബിപിഎസിൻ്റെ ഔദ്യോഗിക വെബ്സൈറ്റ് സന്ദര്‍ഷിക്കുക
2. ഐബിപിഎസ് എസ്ഒ റിസൾട്ട് എന്ന ലിങ്കിൽ ക്ലിക്ക് ചെയ്യുക
3. ലോഗിൻ വിവരം നൽകുക
4. പരീക്ഷാഫലം വിശദമായി പരിശോധിക്കുക
5. പരീക്ഷാഫലം ഡൗൺലോഡ് ചെയ്ത് സൂക്ഷിക്കുക.

IBPS ക്ലര്‍ക്ക് മെയിൻ പരീക്ഷയുടെ അഡ്മിറ്റ് കാര്‍ഡ് പ്രസിദ്ധീകരിച്ചു

യോഗ്യത

ഐടി ഓഫിസർ (സ്‌കെയിൽ–1): കംപ്യൂട്ടർ സയൻസ്/ കംപ്യൂട്ടർ ആപ്ലിക്കേഷൻസ്/ഐടി / ഇലക്‌ട്രോണിക്‌സ്/ ഇലക്‌ട്രോണിക്‌സ് ആൻഡ് ടെലികമ്യൂണിക്കേഷൻസ് / ഇലക്‌ട്രോണിക്‌സ് ആൻഡ് കമ്യൂണിക്കേഷൻ / ഇലക്‌ട്രോണിക്‌സ് ആൻഡ് ഇൻസ്‌ട്രുമെൻ്റേഷൻ എന്നിവയിൽ നാലു വർഷ എൻജിനീയറിങ്/ ടെക്നോളജി ബിരുദം.

അല്ലെങ്കിൽ

ഇലക്ട്രോണിക്സ് / ഇലക്‌ട്രോണിക്‌സ് ആൻഡ് ടെലികമ്യൂണിക്കേഷൻ / ഇലക്‌ട്രോണിക്‌സ് ആൻഡ് കമ്യൂണിക്കേഷൻ / ഇലക്‌ട്രോണിക്‌സ് ആൻഡ് ഇൻസ്‌ട്രുമെൻ്റേഷൻ/ കംപ്യൂട്ടർ സയൻസ് / കംപ്യൂട്ടർ ആപ്ലിക്കേഷൻസ് / ഐടി ബിരുദാനന്തര ബിരുദം അല്ലെങ്കിൽ ബിരുദവും ഡിഒഇഎസിസി ബി ലെവൽ ജയവും.

രാജ്ഭാഷാ അധികാരി തസ്തികയിൽ അപേക്ഷിക്കുന്നവര്‍ ബിരുദതലത്തിൽ ഇംഗ്ലീഷ് ഒരു വിഷയമായി പഠിച്ച് ഹിന്ദിയിൽ ബിരുദാനന്തര ബിരുദം. അല്ലെങ്കിൽ ബിരുദതലത്തിൽ ഹിന്ദിയും ഇംഗ്ലീഷും വിഷയമായി പഠിച്ച് സംസ്കൃതത്തിൽ ബിരുദാനന്തര ബിരുദം.

ലോ ഓഫീസര്‍ - നിയമ ബിരുദം. ബാര്‍ കൗൺസിലിൽ അഡ്വക്കേറ്റായി എൻറോൾ ചെയ്തവരാകണം. ഐടി ഓഫിസർ ഒഴികെയുള്ള തസ്‌തികകളിലേക്കുള്ള അപേക്ഷകർക്കു കംപ്യൂട്ടർ ഓപ്പറേഷൻസ്, ലാംഗ്വേജ് സര്‍ട്ടിഫിക്കറ്റ്, ഡിപ്ലോമ, ഡിഗ്രി യോഗ്യത എന്നിവ ഉണ്ടായിരിക്കണം. അല്ലെങ്കിൽ ഹൈസ്കൂൾ തലത്തിലെങ്കിലും ഐ.ടി ഒരു വിഷയമായി പഠിച്ചിരിക്കണം. എല്ലാ അപേക്ഷകരും കംപ്യൂട്ടര്‍ പ്രവര്‍ത്തിപ്പിക്കാനും ഉപയോഗിക്കാനും അറിവുള്ളവരാകണം.