10000 പേരെ ജോലിക്കെടുക്കാനൊരുങ്ങി ബിഗ്ബാസ്ക്കറ്റ്

രാജ്യം മുഴുവൻ ലോക്ക്ഡൗൺ പ്രഖ്യാപിച്ചിരിക്കുന്ന സാഹചര്യത്തിൽ 10000-ത്തോളം പേരെ ജോലിക്കെടുക്കാനൊരുങ്ങി ബിഗ്ബാസ്ക്കറ്റ്. രാജ്യത്തെ 26 നഗരങ്ങളിലേക്കാണ് പുതുതായി ജീവനക്കാരെ തേടുന്നത്.

പച്ചക്കറികൾ, പലവ്യജ്ഞനങ്ങൾ എന്നിവ ലഭ്യമാക്കുന്ന ഓൺലൈൻ പ്ലാറ്റ്ഫോമാണ് ബിഗ്ബാസ്ക്കറ്റ്. രാജ്യത്ത് ലോക്ക്ഡൗൺ പ്രഖ്യാപിച്ച സാഹചര്യത്തിൽ നിരവധി ഓര്‍ഡറുകളാണ് ദിവസവും ബിഗ്ബാസ്ക്കറ്റിൽ എത്തുന്നത്. ഇത് കൃത്യമായി ഡെലിവര്‍ ചെയ്യാനും സാധനങ്ങൾ സംഭരിച്ച് വെക്കാനുമാണ് ഇത്രയധികം ജീവനക്കാരെ ജോലിക്കെടുക്കുന്നതിനെക്കുറിച്ച് ആലോചിക്കുന്നതെന്ന് ബിഗ്ബാസ്ക്കറ്റ് എച്ച്ആര്‍ വൈസ് പ്രസിഡൻ്റ് തനൂജ തിവാരി പിടിഐയോട് പറഞ്ഞു.

രാജ്യത്ത് ലോക്ക്ഡൗൺ പ്രഖ്യാപിച്ചതോടെ കൃത്യസമയത്ത് ഡെലിവറി നടത്താൻ കഴിയാത്ത അവസ്ഥയിലാണ് മിക്ക ഓൺലൈൻ സ്ഥാപനങ്ങളും. ഈ അത്യാവശ്യഘട്ടത്തിൽ ജോലിയിൽ പ്രവേശിക്കുന്നവര്‍ക്ക് മികച്ച ശമ്പളവും ആനുകൂല്യങ്ങളും ഹെൽത്ത് ഇൻഷുറൻസും ഏര്‍പ്പെടുത്തുമെന്നും ബിഗ്ബാസ്ക്കറ്റ് വ്യക്തമാക്കി. ഇൻഡോറിലും കൊച്ചിയിലുമൊഴികെയുള്ള എല്ലാ നഗരങ്ങളിലും ജോലിക്കാരുടെ കുറവുണ്ട്. ആവശ്യമുള്ള ഉപഭോക്താക്കൾക്ക് സാധനങ്ങൾ വീടുകളിൽ എത്തിച്ച് നൽകാൻ ഊബറുമായും ബിഗ്ബാസ്ക്കറ്റ് കൈക്കോര്‍ത്തിരുന്നു.