'ജോലി എവിടെയും ലഭിക്കും' എന്തിനാണ് ഇവിടെത്തന്നെ ജോലി...?
എന്ത് കൊണ്ടാണ് ഇവിടെ ജോലി ചെയ്യാൻ ആഗ്രഹിക്കുന്നത് എന്ന ചോദ്യം ഒരിക്കലെങ്കിലും നേരിടാത്തവര് ഉണ്ടാവില്ല. പലപ്പോഴും അഭിമുഖത്തിൻ്റെ അവസാനമാവും ഇത്തരം ചോദ്യങ്ങൾ വരുന്നത്. ആ സമയത്ത് എന്ത് പറയണമെന്നറിയാതെ നിന്ന് വിയര്ക്കുന്നവരാണ് അധികവും. അല്ലെങ്കിൽ കാണാതെ പഠിച്ച കുറച്ച് ഉത്തരങ്ങൾ പറയും. ശരിക്കും എങ്ങനെയാണ് നിങ്ങൾ ഉത്തരം പറയേണ്ടത്.
എന്താണ് കമ്പനി
ശരിക്കും എന്താണ് കമ്പനി എന്ന് അറിഞ്ഞിട്ടാണോ നിങ്ങൾ അഭിമുഖങ്ങളിൽ പങ്കെടുക്കുന്നത്. മേൽ പറഞ്ഞ ചോദ്യം വരുമ്പോൾ ഉത്തരമായി നൽകാവുന്ന ഒന്നാണ് കമ്പനിയുടെ നേട്ടങ്ങൾ. കമ്പനി എന്താണ്, എങ്ങനെ, എപ്പോൾ, നേട്ടങ്ങൾ തുടങ്ങിയ കാര്യങ്ങൾ നേരത്തെ അറിഞ്ഞ് വെക്കണമെന്ന് സാരം. ഇന്ന് എല്ലാ കമ്പനികളുടേയും വിവരം വെബ്സൈറ്റിൽ ലഭ്യമാണ്. അതിൽ നിന്നും വേണ്ട വിവരങ്ങൾ എടുത്ത് നമ്മുടേതായ രീതിയിൽ വിവരങ്ങൾ സജ്ജമാക്കി വെച്ചിരിക്കണം. കമ്പനിയെക്കുറിച്ച് നന്നായി അറിഞ്ഞ ശേഷമാണ് നിങ്ങൾ അഭിമുഖത്തിന് എത്തുന്നതെന്ന വിവരം മാനേജറേയും സന്തോഷപ്പെടുത്തും.
സോഷ്യൽ മീഡിയ
പേരുകേട്ടത് എന്നല്ല, ചെറുതും വലുതുമായ എല്ലാ സ്ഥാപനങ്ങൾക്കും ഇന്ന് സോഷ്യൽ മീഡിയ അക്കൗണ്ടുകൾ ഉണ്ട്. അതിൽ എല്ലാ വിവരങ്ങളും ഇക്കൂട്ടര് പങ്കുവെക്കാറുമുണ്ട്. ഒരു റിക്രൂട്ടര് നിങ്ങളുടെ അക്കൗണ്ടിൽ പരതുന്നതുപ്പോലെ നിങ്ങളും അപേക്ഷിച്ച കമ്പനിയുടെ അക്കൗണ്ടുകൾ ചെക്ക് ചെയ്യണം. അല്ല, അവയെക്കുറിച്ച് പഠിക്കണം. ചോദ്യങ്ങൾക്ക് ഉത്തരം നൽകുമ്പോൾ പലയിടങ്ങളിലായി ഇത് ചേര്ക്കാൻ സാധിക്കും. മാത്രമല്ല, മേൽപ്പറഞ്ഞ ചോദ്യം വരുമ്പോൾ കമ്പനിയുടെ ഏറ്റവും പുതിയ നേട്ടങ്ങളും നിങ്ങൾക്ക് അവരെ അറിയിക്കാം.
എന്താണ് ജോലി
എന്താണ് നിങ്ങളുടെ ജോലിയുടെ റോൾ. ഈ ചോദ്യത്തിന് എത്രപേര് നിങ്ങൾക്ക് മറുപടി നൽകിയിട്ടുണ്ട്.പലരും അത് പറഞ്ഞാൽ മനസിലാവില്ല, ഒരുപാടുണ്ട് എന്നൊക്കെ പറഞ്ഞൊഴിയും. ശരിക്കും അങ്ങനെയാണോ വേണ്ടത്. നിങ്ങൾ എന്താണ് ചെയ്യേണ്ടതെന്ന കൃത്യമായ ധാരണയുണ്ടായിരിക്കണം. മേഷപ്പറഞ്ഞ ചോദ്യത്തിന് ഇതും ഒരു ഉത്തരമാണ്. എനിക്കേറ്റവും ഇഷ്ടമുള്ള ജോലി ഇതാണെന്നോ, ഈ രീതിയിലുള്ള ജോലി ആണ് ആഗ്രഹിക്കുന്നതെന്നോ തുടങ്ങി സത്യസന്ധമായ എല്ലാ മറുപടിയും ഇതോട് ചേര്ത്ത് പറയാവുന്നതാണ്.
ഇഷ്ടമാണ്
എനിക്ക് ഈ ജോലി ഇഷ്ടമാണ് എന്ന് വെറുതെ പറഞ്ഞിട്ട് കാര്യമില്ല. എന്തുക്കൊണ്ടാണ് ഇഷ്ടമെന്ന് വ്യക്തമാക്കാൻ കഴിയണം. താത്പര്യമാണോ, ജോലിയുടെ സ്കോപാണോ തുടങ്ങി കാര്യമെന്താണെങ്കിലും അവരെ അറിയിച്ചിരിക്കണം. പണത്തിനപ്പുറമാണ് താത്പര്യവും അഭിരുചിയും. ഇഷ്ടമില്ലാത്ത ജോലി കഷ്ടപ്പെട്ട് ഇഷ്ടപ്പെടുന്നതിലും ഭേദം ഇഷ്ടമുള്ള ജോലി തുടരുന്നതല്ലേ നല്ലത്. അതില്നിന്നും ലഭിക്കുന്ന സംതൃപ്തി മറ്റെവിടെ നിന്ന് ലഭിക്കും. സത്യം പറഞ്ഞാൽ സ്കോപ് എല്ലാ മേഖലയിലുമുണ്ട്. നിങ്ങൾ എങ്ങനെയാണ് കൈകാര്യം ചെയ്യുന്നത് എന്ന് അനുസരിച്ചിരിക്കുമെന്ന് മാത്രം.
നിങ്ങളെ തിരിച്ചറിയുക
1. എന്ത് തരത്തിലുള്ള ജോലിയാണ് വേണ്ടത്
2. ഏത് രീതിയിലുള്ള കമ്പനിയിലാണ് ജോലി ചെയ്യേണ്ടത്
3. എന്താണ് നിങ്ങളുടെ ലക്ഷ്യം
4. എന്തൊക്കെ നേട്ടങ്ങളാണ് പ്രതീക്ഷിക്കുന്നത്
ഈ നാല് ചോദ്യങ്ങളും കടന്ന് നിങ്ങൾക്ക് നിങ്ങളോട് ചോദിക്കാൻ ഒരുപാട് കാര്യങ്ങളുണ്ടാവും. എല്ലാ ജോലിയുടേയും അടിസ്ഥാനം ആത്മസംതൃപ്തിയാണ്. നിങ്ങൾ നിങ്ങൾക്ക് വേണ്ടിയാണ് ജിവിക്കേണ്ടത്, മറ്റുള്ളവര്ക്ക് വേണ്ടിയല്ല.