ഇങ്ങനെയാണോ ജോലി അന്വേഷിക്കുന്നത്...?

നിങ്ങളുടെ മേഖലയുമായി ബന്ധപ്പെട്ട കാര്യങ്ങൾ ഗൂഗിളിൽ സേര്‍ച്ച് ചെയ്യാറുണ്ടോ. ചെയ്യണം എന്നാണ് മറുപടി. ഗൂഗിളിൽ സേര്‍ച്ച് ചെയ്യുന്നത് വഴി ഒരുപാട് ജോലി ഒഴിവുകൾ കണ്ടെത്താൻ സാധിക്കും. മാത്രമല്ല, മികച്ച വെബ്സൈറ്റുകൾ സന്ദര്‍ശിക്കുന്നതു വഴി ഏത് തരത്തിലുള്ള സ്കിൽസാണ് നിങ്ങൾ വളര്‍ത്തിയെടുക്കേണ്ടതെന്നും മനസിലാവും.

യൂണിവേഴ്സിറ്റി കരിയര്‍ സെല്ലിൽ സേര്‍ച്ച് നടത്തുന്നത് വഴി പുതിയ ഒഴിവുകളെക്കുറിച്ചും അഭിമുഖത്തെക്കുറിച്ചും ധാരണയുണ്ടാകും. അഭിമുഖ സമയവും തീയതിയും മനസിലാക്കി തയ്യാറെടുപ്പ് ആരംഭിക്കാൻ സാധിക്കും.

പഠിച്ചിറങ്ങുന്ന സമയത്തുതന്നെ ബയോഡാറ്റ തയ്യാറാക്കിയിരിക്കണം. ജോലിക്ക് അപേക്ഷിക്കുന്നതിൻ്റെ തലേ ദിവസം ബയോഡാറ്റ ഉണ്ടാക്കാൻ ധൃതി പിടിക്കരുത്. നേരത്തെ തന്നെ ഇത് എഴുതി ചിട്ടപ്പെടുത്തി മെയിലിലും പ്രിൻ്റ്ഔട്ട് കയ്യിലും സൂക്ഷിച്ചിരിക്കണം. പുതിയ വിവരങ്ങൾ ചേര്‍ക്കാനും മറക്കരുത്.

പഠിച്ചിറങ്ങുന്ന വിദ്യാര്‍ഥികൾക്ക് ജോലി ലഭിക്കാനുള്ള മികച്ച മാര്‍ഗങ്ങളിലൊന്ന് ഇൻ്റേൺഷിപ്പാണ്. കുറഞ്ഞത് മൂന്നു മാസമെങ്കിലും ഇൻ്റേൺഷിപ്പ് ചെയ്യണം. ഇൻ്റേൺഷിപ്പ് ചെയ്യുന്ന സമയത്ത് നിങ്ങൾ മികച്ച പ്രകടനം കാഴ്ചവെക്കുകയാണെങ്കിൽ ആ സ്ഥാപനത്തിൽ തന്നെ ജോലി ലഭിക്കാനുള്ള സാധ്യത വളരെ കൂടുതലാണ്.

എനിക്ക് ജോലി ലഭിക്കും എന്ന ഉത്തമ ബോധ്യത്തോടെയാവണം അഭിമുഖത്തിൽ പങ്കെടുക്കുന്നത്. ചിലരുണ്ട്, തനിക്ക് ഒന്നും അറിയില്ല, പേടിയാവുന്നു എന്നും പറഞ്ഞ് മറ്റുള്ളവരെക്കൂടി പേടിപ്പിക്കുന്നത്. ഇത്തരക്കാരെ ഒരിക്കലും കൂടെക്കൂട്ടരുത്. എവിടെയെങ്കിലും ഒഴിവ് കണ്ടാൽ അപേക്ഷിക്കുക, അഭിമുഖത്തിൽ പൂര്‍ണ കോൺഫിഡൻസോടെ പങ്കെടുക്കുക. ഇനി കിട്ടിയില്ലെങ്കിൽ പോട്ടെ, മറ്റൊരു നല്ല ജോലി തനിക്കായി കാത്തിരിക്കുന്നുണ്ടെന്ന് ഉറച്ച് വിശ്വസിക്കുക.