ശമ്പളം ചോദിച്ചു വാങ്ങാം, ദേ...ഇങ്ങനെ!

കമ്പനി ഏതുതന്നെ ആയാലും നിങ്ങളുടെ കഴിവ് അവര്‍ക്ക് അറിയണമെന്നില്ല. ആയതിനാൽ, നിങ്ങളെന്താണെന്നും എന്തുകൊണ്ടാണ് ഇത്ര ശമ്പളം ചോദിക്കുന്നതെന്നും അവരെ പറഞ്ഞ് മനസിലാക്കണം. നിങ്ങൾക്ക് ഇത്രയധികം ശമ്പളം ലഭിക്കാനുള്ള അവകാശമുണ്ടെന്ന് കമ്പനിക്ക് മനസിലായി കഴിഞ്ഞാൽ പിന്നെ ഒന്നും പേടിക്കാനില്ല.

നിങ്ങളപേക്ഷിച്ചിരിക്കുന്ന അതേ പൊസിഷന് മറ്റ് കമ്പനികളിൽ എത്ര രൂപയാണ് ശമ്പളം നൽകുന്നതെന്ന് അറിഞ്ഞിരിക്കണം. അതുമായി ബന്ധപ്പെടുത്തി നിങ്ങൾക്ക് ശമ്പളം ചോദിക്കാവുന്നതാണ്. മാത്രമല്ല, നിങ്ങളുടെ എക്സ്പീരിയൻസും കണക്കിലെടുത്താവണം ശമ്പള ചോദ്യം.

ആദ്യം കമ്പനി ഒരു ശമ്പളം പറയും, പിന്നെ നിങ്ങളതിനോട് യോജിക്കുന്നു. അരുത്, ഇങ്ങനെ ചെയ്യരുത്. ശമ്പളം എത്ര പറഞ്ഞാലും നിങ്ങൾ കൂട്ടി ചോദിക്കണം. നിങ്ങളുടെ ആവശ്യങ്ങൾ വ്യക്തമാക്കണം. എപ്പോഴും ശമ്പളം കൂട്ടി ചോദിക്കാൻ മടിക്കരുത്.

എന്താണ് നിങ്ങളുടെ ചിലവുകളെന്ന് കമ്പനിക്ക് മനസിലാകണം. അതായത്, പുതിയ ജോലി സ്ഥലം, അവിടുത്തെ ചിലവ്, ഭക്ഷണം, താമസം എന്നിവയൊക്കെ കണക്കിലെടുക്കണമെന്ന് സാരം.

നിങ്ങളുടെ ചോദ്യം ന്യായമായിരുന്നിട്ടും ശമ്പളം കൂട്ടി നൽകാൻ തയ്യാറാകുന്നില്ലെങ്കിൽ നോ പറയുന്നതാണ് നല്ലത്. ഇതിലും വലിയ എന്തോ വരാനുണ്ടെന്ന് വിശ്വസിക്കുന്നതാണ് ബുദ്ധി. കാരണം, നിങ്ങളുടെ കഴിവിന് അനുസരിച്ചാണ് ശമ്പളം ലഭിക്കേണ്ടത്. ഇത്തരം കാര്യങ്ങളിൽ വിട്ടുവീഴ്ച അരുത്.