ടെൻഷനോട് ഇനി ബൈ ബൈ പറയാം...!

ഒരു ദിവസം ആരംഭിക്കുന്നമുറക്ക് പ്ലാൻ ഉണ്ടാക്കുക എന്ന് പറയുന്നത് കഠിനമാണെന്ന് അറിയാം. എങ്കിലും അന്ന് ഓഫീസിൽ പോയി എന്തൊക്കെ ചെയ്യണം, എപ്പോൾ ചെയ്യണം തുടങ്ങി എല്ലാ കാര്യങ്ങളെക്കുറിച്ചും കൃത്യമായ ധാരണയുണ്ടായിരിക്കണം. ഇതുവഴി, നിങ്ങൾക്ക് സമയം ക്രമീകരിക്കാമെന്ന് മാത്രമല്ല, ടെൻഷനടിക്കാതെ ജോലിയും ചെയ്തു തീര്‍ക്കാം.

ജോലി ചെയ്തു തീര്‍ക്കാൻ സമയം തികയാതെ വരുന്നതോടെയാണ് ടെൻഷൻ ആരംഭിക്കുന്നത്. എഴുന്നേൽക്കുമ്പോൾ മുതൽ അതോര്‍ത്ത് ടെൻഷനാണ്. നമ്മുടെ സന്തോഷവും സമാധാനവും മറ്റുള്ളവരുടെ ഉത്തരവാദിത്തമോ ജോലിയോ അല്ല, നമ്മുടേത് മാത്രമാണെന്ന് തിരിച്ചറിയുന്നിടത്താണ് വിജയം. ഇതനുസരിച്ചാവണം സമയം ക്രമീകരണം.

ജോലി സ്ഥലത്ത് കൂട്ടുകൂടാമെങ്കിലും എപ്പോഴും ഒരു പരിധി വേണം. അധികം ആളുകളുമായി കൂട്ടുകൂടുന്നത് വിവിധ ഓഫീസ് ഗോസിപ്പുകളിൽ ഇടം പിടിക്കാനാവും സഹായിക്കുന്നത്. മാത്രമല്ല, ഇതുവഴി മറ്റനേകം പ്രശ്നങ്ങൾ നിങ്ങളിലെത്താനും സാധ്യതയുണ്ട്. മാത്രമല്ല, താത്പര്യമില്ലാത്ത കാര്യങ്ങൾക്ക് നോ പറയുക, സാദിക്കുമെങ്കിൽ പ്രശ്നങ്ങൾ യഥാസമയം ക്രമീകരിക്കാനും ശ്രദ്ധിക്കണം.

കൃത്യ സമയത്ത് അല്ലെങ്കിൽ ഒരൽപ്പം നേരത്തെ ജോലിക്ക് എത്തുന്നത് വെപ്രാളവും ടെൻഷനും ഒഴിവാക്കാൻ സഹായിക്കും. ശ്രദ്ധയോടെയാവണം ജോലി. ഇടയിലുള്ള സംസാരം, ഫോൺ ഉപയോഗം, വിനോദത്തിനായുള്ള മറ്റ് കാര്യങ്ങൾ എന്നിവ നിയന്ത്രിക്കണം.

നിങ്ങളെ ചിന്താകുലരാക്കുന്ന ആധിപിടിപ്പിക്കുന്ന കാര്യങ്ങൾ കണ്ടെത്തി ആ ജോലികൾ ആദ്യം ചെയ്യുന്നത് വഴി ടെൻഷൻ ഒരു പരിധിവരെ നിയന്ത്രിക്കാൻ സാധിക്കും. ചെയ്യാൻ പറ്റുമെന്ന് ഉറപ്പില്ലാത്ത കാര്യങ്ങൾ ഏറ്റെടുക്കാത്തതാണ് നല്ലത്. ഊഹങ്ങൾ നിര്‍ത്തി വ്യക്തത നേടിയാവണം മുന്നോട്ടുപോക്ക്. ഓഫീസ് കാര്യങ്ങൾ പരമാവധി ഓഫീസിൽ തന്നെ അവസാനിപ്പിക്കുക. അതേസമയം, നിങ്ങളുടെ പരിധിയിൽ നിൽക്കാത്ത പ്രശ്നങ്ങൾ മേലധികാരികളെ അറിയിക്കുന്നതാണ് നല്ലത്. അതുവഴി നിര്‍ണായക തീരുമാനങ്ങൾ സ്വീകരിക്കുന്നതിൻ്റെ സമ്മര്‍ദ്ദം കുറക്കാൻ സാധിക്കും.