സംസ്ഥാനത്തെ വളര്ച്ചാ ഘട്ടത്തിലുള്ള സ്റ്റാര്ട്ടപ്പുകള്ക്ക് സുസ്ഥിര സംരംഭങ്ങളായി വികസിക്കുന്നതിന് സമഗ്ര പിന്തുണയേകാന് ടെക്നോപാര്ക്കില് ആക്സിലറേറ്റര് ഫോര് ഇലക്ട്രോണിക്സ് ടെക്നോളജീസ് (എയ്സ്) വരുന്നു. കേരള സ്റ്റാര്ട്ടപ്പ് മിഷനും സി-ഡാക്കും സംയുക്തമായാണ് എയ്സ് സ്ഥാപിച്ചത്.
സ്റ്റാര്ട്ടപ്പുകള്ക്കാവശ്യമായ ഭൗതിക-ബൗദ്ധിക അടിസ്ഥാന സൗകര്യങ്ങള് ആക്സലറേറ്ററില് ലഭിക്കും. നിശ്ചിത കാലയളവില് സി-ഡാക്കിന്റെ മാര്ഗനിര്ദ്ദേശവും ലഭ്യമാകും. 50000 ചതുരശ്രയടി വിസ്തീര്ണ്ണമുള്ള ആക്സലറേറ്റര് സൗകര്യത്തിലൂടെ ആയിരത്തോളം നേരിട്ടുള്ള തൊഴിലവസരങ്ങളാണ് സൃഷ്ടിക്കപ്പെടുക. നിലവില് ഇരുപതോളം സ്റ്റാര്ട്ടപ്പുകള്ക്ക് സ്ഥലം അനുവദിച്ചു. കൊച്ചിയിലെ സ്റ്റാര്ട്ടപ്പ് മിഷന് ഇന്കുബേറ്ററുമായി സഹകരിച്ചാവും എയ്സ് പ്രവര്ത്തിക്കുക. അത്യാധുനിക ഇലക്ട്രോണിക്സ് സംവിധാനങ്ങളുടേയും ഉപകരണങ്ങളുടേയും സേവനങ്ങളുടേയും ഗവേഷണത്തിനും വികസനത്തിനുമുള്ള സോഫ്റ്റ്വെയര് അടിസ്ഥാന സൗകര്യങ്ങള്ക്കും ആക്സിലറേറ്റര് സഹായകമാകും. രാജ്യത്തെ ഇലക്ട്രോണിക്സ് ടെക്നോളജി മേഖലയില് പ്രമുഖ ആക്സിലറേറ്ററായി വളരുകയാണ് എയ്സിന്റെ ലക്ഷ്യം.
Also Read: സാമൂഹ്യനീതി വകുപ്പ് ഡയറക്ടറുടെ കാര്യാലയത്തില് പ്രോജക്ട് അസിസ്റ്റന്റ് ഒഴിവ്
എയ്സിന്റെ ഉദ്ഘാടനം നവംബര് രണ്ടിന് രാവിലെ 11.45 ന് ഓണ്ലൈനായി മുഖ്യമന്ത്രി പിണറായി വിജയന് നിര്വഹിക്കും. സഹകരണ മന്ത്രി കടംപള്ളി സുരേന്ദ്രന് അദ്ധ്യക്ഷത വഹിക്കുന്ന ചടങ്ങില് ഐ.ടി ആന്റ് ഇലക്ട്രോണിക്സ് വകുപ്പ് സെക്രട്ടറി മുഹമ്മദ് വൈ സഫീറുള്ള, സി-ഡാക് ഡയറക്ടര് ജനറല് ഡോ. ഹേമന്ത് ദര്ബാരി, സ്റ്റാര്ട്ടപ്പ് സി.ഇ.ഒ ശശി പിലാത്തേരി മീത്തല് എന്നിവര് പങ്കെടുക്കും.