കൊറോണ വൈറസ് രോഗബാധയുടെ പശ്ചാത്തലത്തിൽ പുതിയ നിയമനങ്ങൾ തടഞ്ഞും ശമ്പളം വെട്ടിക്കുറച്ചും ഹാര്‍വാര്‍ഡും എംഐടിയുമടക്കമുള്ള യു.എസ് സര്‍വകലാശാലകൾ. കൊവിഡിനെ തുടര്‍ന്ന് വരുന്ന സാമ്പത്തിക വര്‍ഷം കടുത്ത സാമ്പത്തിക പ്രതിസന്ധി ഉണ്ടായേക്കാവുന്ന സാഹചര്യത്തിലാണ് ഇത്തരത്തിലൊരു നിയന്ത്രണം.

രോഗബാധയെത്തുടര്‍ന്ന് കടുത്ത സാമ്പത്തിക പ്രതിസന്ധികൾ ഉടലെടുത്തോടെയാണ് ഇത്തരമൊരു തീരുമാനത്തിലേക്ക് സര്‍വകലാശാലകൾ എത്തിയത്. സര്‍വകലാശാലയുമായി അഫിലിയേറ്റ് ചെയ്തിട്ടുള്ള എല്ലാ സ്ഥാപനങ്ങളിലും 25 ശതമാനം വരെ ശമ്പളം കുറയുമെന്നാണ് അറിയാൻ കഴിയുന്നത്. 2008ലെ സാമ്പത്തിക മാന്ദ്യത്തേക്കാൾ വലിയ പ്രതിസന്ധിയാണ് വരാനിരിക്കുന്നതെന്ന് വിദഗ്ധര്‍ ചൂണ്ടിക്കാണിക്കുന്നു. ഇതിനുപുറമേ, മറ്റ് സ്ഥാപനങ്ങളും ശമ്പളം വെട്ടിക്കുറച്ചിട്ടുണ്ട്.

അതേസമയം, വര്‍ക്ക് ഫ്രം ഹോം വിജയമായതോടെ ലോക്ക്ഡൗൺ കഴിഞ്ഞാലും ഇത് തുടരുമെന്നാണ് വിവിധ കമ്പനികൾ അറിയിച്ചിരിക്കുന്നത്. വൈറസ് ബാധ, പ്രളയമടക്കമുള്ള പ്രതിസന്ധി ഘട്ടങ്ങളിൽ മാത്രമല്ല മറ്റ് അവസരങ്ങളിലും ഈ രീതി പരീക്ഷിക്കുമെന്ന് വൻകിട കമ്പനികളുടെ എച്ച്ആര്‍ മാനേജര്‍ വ്യക്തമാക്കി. ജീവനക്കാരെ സംബന്ധിച്ച് ഇത് ഗതാഗത ചെലവ് കുറക്കാനും കുടുംബത്തിനൊപ്പം സമയം ചിലവഴിക്കാൻ കിട്ടുന്ന മികച്ച അവസരവുമാണ്. ഇത് ജോലിയോടുള്ള ആത്മാര്‍ത്ഥ കൂട്ടുന്നുണ്ടെന്നും കമ്പനികൾ വ്യക്തമാക്കി. അമേരിക്കയുൾപ്പെടെയുള്ള വിദേശ രാജ്യങ്ങളിൽ വര്‍ക്ക് ഫ്രം ഹോം സാധാരണമാണ്. ഇതേ രീതി ഇന്ത്യയിലും തുടരാനായാൽ അത് മികച്ച ഫലം സൃഷ്ടിക്കുമെന്ന് സ്ഥാപന മേധാവികൾ പറയുന്നു. ഇത് സ്ഥാപനത്തിൻ്റെ ചിലവ് കുറക്കാനും വഴിവെക്കും.

മികച്ച ശമ്പളം, ഉയര്‍ന്ന നിലവാരം; ഏറ്റവും പ്രിയപ്പെട്ട നഗരം ഏത്?