ആത്മവിശ്വാസം അപ്പോഴും കൈവിടരുത്
ഭൂരിഭാഗം ഇന്റര്‍വ്യൂകളിലും യൂ ആര്‍ നോട്ട് സെലക്ടഡ് എന്ന് അവര്‍ പറയുന്നതിന്റെ അര്‍ത്ഥം നിങ്ങളെ തല്‍ക്കാലം അവര്‍ക്ക് വേണ്ട എന്നു തന്നെയായിരിക്കും. എന്നാല്‍ ഇനി അങ്ങനെ ചിന്തിക്കാതെ ഇരിക്കൂ. ഒരുപക്ഷേ അവരുടെ ആ വാചകം ഒരു പരീക്ഷണമായിരിക്കാം. അത് കേള്‍ക്കുമ്പോള്‍ ഉദ്യോഗാര്‍ത്ഥിയില്‍ ഉണ്ടാകുന്ന മാറ്റവും അയാളില്‍ നിന്നുണ്ടാകുന്ന പ്രതികരണവും അറിയാനായിരിക്കും അവര്‍ ശ്രമിക്കുന്നത്. അതിനാല്‍ ശുഭാപ്തി വിശ്വാസം ഒരിക്കലും കൈവിടരുത്.
ചോദ്യത്തില്‍ കാര്യമുണ്ട്
നിങ്ങളെ തെരഞ്ഞെടുക്കാന്‍ ഞങ്ങള്‍ക്കാവില്ല എന്ന് അവര്‍ പറയുമ്പോഴും പതറാതെ തന്നെ ഇരിക്കുക. അതുവരെ നിങ്ങള്‍ എങ്ങനെയായിരുന്നോ ഇന്റര്‍വ്യൂ ബോര്‍ഡിനെ അഭിമുഖീകരിച്ചത് അതുപോലെ തന്നെ തുടരുക. മുഖത്ത് ഭാവവ്യത്യാസങ്ങള്‍ വരാതെ തന്നെ തുടരുന്നതാണ് നല്ലത്. നിങ്ങളെ പരീക്ഷിക്കുന്നതിന്റെ ഭാഗമായിട്ടായിരിക്കും അവര്‍ ഒരുപക്ഷേ അങ്ങനെ ചെയ്യുന്നത്. നിങ്ങളുടെ കഴിവ് തെളിയിക്കാനുള്ള അവസാന അവസരമായിരിക്കും അത്.
ശാന്തത കൈവിടാതിരിക്കുക
അഭിമുഖങ്ങളില്‍ പങ്കെടുക്കുന്നവര്‍ പ്രധാനമായും ശ്രദ്ധിക്കേണ്ട കാര്യമാണിത്. അവര്‍ നിങ്ങളെ പ്രലോഭിപ്പിക്കാന്‍ പലതരം ചോദ്യങ്ങള്‍ ചോദിക്കും. നിങ്ങളുടെ മാനസികാവസ്ഥയും ഒരു സാഹചര്യം കൈകാര്യം ചെയ്യാന്‍ നിങ്ങള്‍ എത്രത്തോളം പ്രാപ്തനാണ് എന്നതടക്കമുള്ള കാര്യങ്ങള്‍ അളക്കുകയായിരിക്കും അവരുടെ ലക്ഷ്യം. നിങ്ങളെ ഞങ്ങള്‍ തെരഞ്ഞെടുക്കുന്നില്ല എന്നും മറ്റുമുള്ള ധ്വനിയില്‍ അവര്‍ സംസാരിക്കുമ്പോളും ശാന്തമായി അത് കേള്‍ക്കാന്‍ ശ്രമിക്കുക. ദേഷ്യപ്പെട്ടോ നിരാശരായോ അവിടെ നിന്ന് എഴുന്നേറ്റ് പോകാതിരിക്കാന്‍ നോക്കുക. ചിലപ്പോള്‍ നിങ്ങള്‍ക്ക് ഒരു അവസരം കൂടി കിട്ടാന്‍ സാധ്യതയുണ്ടെങ്കിലോ.
Also Read: തൃപ്പൂണിത്തുറ സംസ്‌കൃത കോളേജില്‍ അധ്യാപക നിയമനം
യോഗ്യതയുണ്ടെങ്കിലും
നിങ്ങള്‍ക്ക് ആ കമ്പനിയില്‍ ജോലി ചെയ്യാനുള്ള യോഗ്യതകളുണ്ടെന്ന് അവര്‍ക്ക് സര്‍ട്ടിഫിക്കറ്റുകള്‍ പരിശോധിക്കുമ്പോള്‍ മനസ്സിലാകും. എന്നാലും നിങ്ങളെ ചൊടിപ്പിക്കാനുള്ള ചില ചോദ്യങ്ങള്‍ പ്രതീക്ഷിക്കാം. ക്ഷമയുള്ള ആളാണോ, മനക്കരുത്ത് ഉണ്ടോ എന്നതടക്കമുള്ള കാര്യങ്ങള്‍ മനസ്സിലാക്കാന്‍ വേണ്ടിയായിരിക്കും അവര്‍ അങ്ങനെ ചെയ്യുക. അപ്പോഴൊക്കെ എങ്ങനെയും ജോലി നേടുക എന്ന ഒറ്റലക്ഷ്യവുമായി ആത്മവിശ്വാസത്തോടെ അവരുമായി സംസാരിക്കുക. നിങ്ങളെ ഇന്റര്‍വ്യൂ ചെയ്യുന്നവരെ അതൃപ്തരാക്കാതിരിക്കാന്‍ ഇന്റര്‍വ്യൂ കഴിയുന്നതുവരെ ശ്രമിക്കാം.