സിവില്‍ സര്‍വീസ് പ്രിലിമിനറി പരീക്ഷ നീട്ടിവെക്കാനാവില്ലെന്ന് യു.പി.എസ്.സി സുപ്രീം കോടതിയെ അറിയിച്ചു. മുന്‍നിശ്ചയിച്ച പ്രകാരം ഒക്ടോബര്‍ 4ന് തന്നെ പരീക്ഷ നടത്താനാണ് തീരുമാനം. ഇതു സംബന്ധിച്ച് യു.പി.എസ്.സി സുപ്രീം കോടതിയില്‍ സത്യവാങ്മൂലം സമര്‍പ്പിച്ചിരുന്നു. പരീക്ഷ ഇപ്പോള്‍ നീട്ടിവെച്ചാല്‍ അത് അടുത്ത വര്‍ഷത്തെ നിയമനത്തെയും ബാധിക്കുമെന്നതിനാല്‍ വീണ്ടും നീട്ടിവെക്കുന്നത് പ്രാവര്‍ത്തികമാകില്ലെന്നും കമ്മീഷന്‍ അറിയിച്ചു.
പരീക്ഷയെഴുതുന്ന എല്ലാ ഉദ്യോഗാര്‍ത്ഥികളും കുറഞ്ഞത് ഡിഗ്രി യോഗ്യതയുള്ളവരാണ്. അതിനാല്‍ കൊറോണ വൈറസ് ഭീതിക്കിടയിലും അവര്‍ക്ക് സുരക്ഷാ മാനദണ്ഡങ്ങള്‍ പാലിച്ച് പരീക്ഷയ്‌ക്കെത്താനുള്ള കാര്യപ്രാപ്തിയുണ്ടെന്നും യു.പി.എസ്.സി സത്യവാങ്മൂലത്തില്‍ പറയുന്നു.
Also Read: ഗവ. ആയുര്‍വേദ കോളേജില്‍ അധ്യാപക നിയമനം
20 സംസ്ഥാനങ്ങളില്‍ നിന്നുള്ള 20 ഉദ്യോഗാര്‍ത്ഥികളാണ് പ്രിലിമിനറി പരീക്ഷ നീട്ടിവെക്കണമെന്നാവശ്യപ്പെട്ട് സുപ്രീം കോടതയില്‍ ഹര്‍ജി നല്‍കിയത്. രണ്ടു മുതല്‍ മൂന്ന് മാസം വരെ പരീക്ഷ നീട്ടിവെക്കണമെന്നായിരുന്നു ആവശ്യം. മെയ് 31 ന് നടക്കാനിരുന്ന പ്രിലിമിനറി പരീക്ഷയാണ് കൊവിഡ് 19 ഭീതി മൂലം നീട്ടിവെച്ചത്. ജൂണ്‍ 6ന് പുതുക്കിയ തീയതി പ്രഖ്യാപിച്ചു. ഒക്ടോബര്‍ 4ന് സിവില്‍ സര്‍വീസ് പ്രിലിമിനറി പരീക്ഷ നടക്കുമെന്ന് യു.പി.എസ്.സി പ്രഖ്യാപിച്ചു. പരീക്ഷയുടെ അഡ്മിറ്റ് കാര്‍ഡ് ഇതിനകം തന്നെ വെബ്‌സൈറ്റില്‍ ലഭ്യമാക്കി.