യു.പി.എസ്.സി എന്‍.ഡി.എ/എന്‍.എ 2021: ഇന്നു കൂടി അപേക്ഷിക്കാന്‍ അവസരം

യൂണിയന്‍ പബ്ലിക് സര്‍വീസ് കമ്മീഷന്‍ നടത്തുന്ന എന്‍.ഡി.എ/എന്‍.എ 2021 പരീക്ഷയ്ക്കായുള്ള രജിസ്‌ട്രേഷന്‍ ഇന്നു കൂടി നടത്താം. ഇതുവരെ അപേക്ഷിക്കാത്തവര്‍ക്ക് യു.പി.എസ്.ഇ യുടെ ഔദ്യോഗിക വെബ്‌സൈറ്റായ upsc.gov.in സന്ദര്‍ശിച്ച് അപേക്ഷിക്കാം. നാഷണല്‍ ഡിഫന്‍സ് അക്കാദമിയിലെയും നേവല്‍ അക്കാദമിയിലെയും 400 ഒഴിവുകളിലേക്കാണ് പരീക്ഷ നടത്തുന്നത്.

ഏപ്രില്‍ 18നാണ് എന്‍.ഡി.എ / എന്‍.എ പരീക്ഷ. 2020 ഡിസംബര്‍ 30 ന് രജിസ്‌ട്രേഷന്‍ ആരംഭിച്ചിരുന്നു. ഉദ്യോഗാര്‍ത്ഥികള്‍ക്ക് യു.പി.എസ്.സി വെബ്‌സൈറ്റ് വഴി ഇന്ന് വൈകുന്നേരം ആറു മണിവരെ അപേക്ഷിക്കാന്‍ അവസരമുണ്ട്. അപേക്ഷിക്കുന്നവര്‍ ഔദ്യോഗിക വിജ്ഞാപനം കൃത്യമായി വായിച്ചു മനസ്സിലാക്കിയതിന് ശേഷം അപേക്ഷിക്കുക. ഓണ്‍ലൈന്‍ രജിസ്‌ട്രേഷന്‍ എങ്ങനെ നടത്തണം എന്നത് സംബന്ധിച്ച വിവരങ്ങള്‍ വെബ്‌സൈറ്റില്‍ വിശദമായി നല്‍കിയിട്ടുണ്ട്. ജനുവരി 27 മുതല്‍ ഫെബ്രുവരി 2 വരെ അപേക്ഷ പിന്‍വലിക്കാനുള്ള അവസരമുണ്ട്.

അപേക്ഷയുടെ പാര്‍ട്ട്1, പാര്‍ട്ട്2 എന്നിവ പൂരിപ്പിക്കേണ്ടതുണ്ട്. അപൂര്‍ണമായ അപേക്ഷകള്‍ നിരസിക്കും. ഏപ്രില്‍ 18നാണ് എഴുത്ത് പരീക്ഷ നിശ്ചയിച്ചിരിക്കുന്നത്. ഒബ്ജക്ടീവ് മാതൃകയിലുള്ള പരീക്ഷയില്‍ മാത്തമാറ്റിക്‌സ്, ജനറല്‍ എബിലിറ്റി എന്നീ മേഖലകളില്‍ നിന്ന് ചോദ്യങ്ങളുണ്ടാകും. രണ്ട് സെക്ഷനുകള്‍ക്കും ഉത്തരം നല്‍കിയിരിക്കണം. രണ്ടര മണിക്കൂര്‍ ദൈര്‍ഘ്യമുള്ളതാണ് പരീക്ഷ. കണക്ക് 300 മാര്‍ക്കിനും ജനറല്‍ എബിലിറ്റി 600 മാര്‍ക്കിനുമായിരിക്കും.

SBI PO Prelims 2021: ഫലം ഇവിടെ പരിശോധിക്കാം
എഴുത്ത് പരീക്ഷയില്‍ ജയിക്കുന്നവര്‍ക്ക് എസ്.എസ്.സി അഭിമുഖമുണ്ടാകും. എഴുത്ത് പരീക്ഷയിലും എസ്.എസ്.ബി അഭിമുഖത്തിലും ലഭിച്ച മാര്‍ക്കുകള്‍ കണക്കാക്കിയാണ് ഉദ്യോഗാര്‍ത്ഥികളെ തെരഞ്ഞെടുക്കുക.