48 മണക്കൂറിനുള്ളിലെ നെഗറ്റീവ് സര്‍ട്ടിഫിക്കറ്റ്
48 മണിക്കൂറിനുള്ളില്‍ ലഭിച്ച കൊവിഡ് നെഗറ്റീവ് സര്‍ട്ടിഫിക്കറ്റ് ഉള്ളവര്‍ക്കു മാത്രമേ അബുദാബിയില്‍ പ്രവേശനം അനുവദിക്കൂ എന്നതാണ് പുതിയ മാറ്റങ്ങളിലൊന്ന്. പിസിആര്‍ ടെസ്റ്റോ ഡിപിഐ ടെസ്റ്റോ നടത്തിയതിന്റെ റിസല്‍ട്ടായിരിക്കണമെന്നും നിബന്ധനയുണ്ട്. 48 മണിക്കൂറിനു മുമ്പുള്ള നെഗറ്റീവ് സര്‍ട്ടിഫിക്കറ്റുമായി അബുദാബിയിലെത്തുന്നവര്‍ക്ക് പ്രവേശനമുണ്ടായിരിക്കുന്നതല്ല.
നാലാം ദിവസം വീണ്ടും ടെസ്റ്റ്
അബുദാബിയില്‍ പ്രവേശിച്ച് നാലാമത്തെ ദിവസം വീണ്ടും ഈ ടെസ്റ്റുകളില്‍ ഏതെങ്കിലുമൊന്ന് നടത്തണമെന്നതാണ് മറ്റൊരു നിബന്ധന. നാലിനും എട്ടിനുമിടയില്‍ ദിവസം താമസിക്കുന്നവര്‍ക്കാണ് ഇത് ബാധകം. എന്നാല്‍ എട്ട് ദിവസമോ അതിലധികമോ തങ്ങുന്നവര്‍ എട്ടാം ദിവസം വീണ്ടും ടെസ്റ്റ് നടത്തണം. അബുദാബിയിലെത്തിയ ദിവസം ഉള്‍പ്പെടെയാണ് ദിവസം കണക്കാക്കുക. സമയത്തിന് ടെസ്റ്റുകള്‍ നടത്താത്തവര്‍ക്ക് പിഴ ഏര്‍പ്പെടുത്താനും കമ്മിറ്റി തീരുമാനിച്ചിട്ടുണ്ട്. പുതിയ വ്യവസ്ഥകള്‍ അനുസരിച്ച് ഞായറാഴ്ച അബുദബിയില്‍ പ്രവേശിക്കുന്നവര്‍ നാലാം ദിവസമായ ബുധനാഴ്ച കൊവിഡ് പരിശോധന നടത്തണം. അതിനു ശേഷം അടുത്ത ഞായറാഴ്ച കഴിഞ്ഞും എമിറേറ്റില്‍ തങ്ങുന്നവരാണെങ്കില്‍ അന്നേ ദിവസം വീണ്ടും ടെസ്റ്റിന് വിധേയരാവണം.
വാക്സിന് എടുത്തവര്‍ക്ക് ബാധകമല്ല
പരീക്ഷണത്തിന്റെ ഭാഗമായോ ദേശീയ വാക്സിനേഷന്‍ കാംപയിന്റെ ഭാഗമായോ കൊവിഡ് പ്രതിരോധ വാക്സിന് സ്വീകരിച്ചവര്‍ക്കും ക്ലിനിക്കല്‍ ട്രയലിന്റെ ഭാഗമായി വാക്സിന് കുത്തിവയ്പ്പിന് വിധേയരായവര്‍ക്കും പുതിയ നിബന്ധനകള്‍ ബാധകമല്ല. അതായത് മൊബൈലിലെ അല്‍ഹുസ്ന്‍ ആപ്പില്‍ E എന്ന ഇംഗ്ലീഷ് അക്ഷരമോ ഗോള്‍ഡ് സ്റ്റാറോ കാണിക്കുന്നവര്‍ക്ക് നിയന്ത്രണം ഉണ്ടായിരിക്കുന്നതല്ല. ഇവരുടെ വാഹനങ്ങള്‍ക്ക് എമര്‍ജന്‍സി ലെയിനിലൂടെ കടന്നുപോവാമെന്നും അധികൃതര്‍ അറിയിച്ചു.