ഭിന്നശേഷിക്കാരിയായ 17കാരിയെ അഞ്ചംഗസംഘം തട്ടിക്കൊണ്ടുപോയി കൂട്ടബലാത്സംഗം ചെയ്തു

ജയ്പൂർ: രാജസ്ഥാനിലെ ദൗസയിൽ അഞ്ചംഗസംഘം സംസാരിക്കാനും കേൾക്കാനും കഴിയാത്ത പതിനേഴുകാരിയെ തട്ടിക്കൊണ്ടുപോയി ബലാത്സംഗം ചെയ്തു. ശനിയാഴ്ച രാത്രിയോടെ പെൺകുട്ടിയുടെ അമ്മയാണ് മന്ദാവലി പോലീസ് സ്റ്റേഷനിൽ മകൾ ക്രൂരതയ്ക്കിരയായെന്ന പരാതി നൽകിയിരിക്കുന്നത്. ഓഗസ്റ്റ് നാലിനായിരുന്നു കേസിനാസ്പദമായ സംഭവം.

സംഭവവുമായി ബന്ധപ്പെട്ട് അഞ്ച് പേർക്കെതിരെയാണ് പെൺകുട്ടിയുടെ അമ്മ പോലീസിൽ പരാതി നൽകിയത്. ഇതിനോടകം മൂന്നു പേരെ അറസ്റ്റ് ചെയ്തതായി പോലീസ് പറഞ്ഞു. പോക്സോ വകുപ്പുകളും തട്ടിക്കൊണ്ടുപോകൽ, ബലാത്സംഗം തുടങ്ങിയ കുറ്റങ്ങളും ചുമത്തിയാണ് പ്രതികൾക്കെതിരെ കേസ് രജിസ്റ്റർ ചെയ്തിരിക്കുന്നത്. മറ്റു രണ്ട് പ്രതികളെ പിടികൂടാനുള്ള ശ്രമം തുടരുകയാണെന്നും പോലീസ് വ്യക്തമാക്കി.

Also Read: രാഖി കെട്ടി നിമിഷങ്ങൾക്കകം സഹോദരിയെ കൊന്ന് സ്വർണം കവർന്ന് സഹോദരന്മാർ

സ്ഥലത്തെ ഒരു കടയിലേക്ക് പോവുകയായിരുന്ന പെൺകുട്ടിയെ അഞ്ച് പേർ ചേർന്ന് തട്ടിക്കൊണ്ടുപോവുകയായിരുന്നു. തുടർന്ന് പെൺകുട്ടിയെ ലൈംഗികമായി പീഡിപ്പിച്ച സംഘം വൈകീട്ട് അഞ്ച് മണിയോടെ ഗ്രാമത്തിലുപേക്ഷിച്ച് കടന്നുകളഞ്ഞെന്നാണ് പരാതിയെന്നും ജയ്പൂർ ഐജി എസ് സെങ്കതിർ പറഞ്ഞു.

സംഭവം നടന്ന് മൂന്ന് ദിവസങ്ങൾക്ക് ശേഷമാണ് പെൺകുട്ടിയുടെ അമ്മ ഇതിനെക്കുറിച്ച് അറിയുന്നത്. തുടർന്ന് ഇവർ പോലീസിൽ പരാതി നൽകുകയായിരുന്നു. കുട്ടിയെ വൈദ്യപരിശോധനയ്ക്ക് വിധേയയാക്കിയെന്നും. ഗുരുതര പരിക്കുകളൊന്നും ഇല്ലെന്നും പോലീസ് പറഞ്ഞു. യുപിയിലും കഴിഞ്ഞദിവസം സമാനമായ സംഭവം റിപ്പോർട്ട് ചെയ്തിരുന്നു. ആറ് വയസുകാരിയെ തട്ടിക്കൊണ്ടുപോയായിരുന്നു ഇവിടെ പീഡനത്തിനിരയാക്കിയത്.