കൊറോണ പടർത്തുമെന്ന് ഭീഷണി; ആശങ്ക സൃഷ്ടിച്ച് വൈറൽ വീഡിയോ, യുവതി അറസ്റ്റിൽ

വാഷിങ്ടണ്‍: കൊറോണ വൈറസ് പടര്‍ത്തുമെന്ന തരത്തിൽ വീഡിയോ പ്രചരിപ്പിച്ച പതിനെട്ടുകാരി അറസ്റ്റിൽ. അമേരിക്കയിലെ ടെക്‌സസ് സ്വദേശിയായ ലോറൻ മരഡിയാഗയെയാണ് പോലീസ് അറസ്റ്റ് ചെയ്തത്. സമൂഹമാധ്യമമായ സ്നാപ്ചാറ്റിൽ പങ്കുവച്ച യുവതിയുടെ വീഡിയോ ഏറെ ആശങ്ക സൃഷ്ടിച്ചിരുന്നു.

വാള്‍മാര്‍ട്ട് സ്‌റ്റോറില്‍നിന്നാണ് വീഡിയോ ചിത്രീകരിച്ചത്. താൻ കൊറോണ ബാധിതയാണെന്നും എല്ലാവര്‍ക്കും അത് പടര്‍ത്താനാണ് ഇവിടെ വന്നിരിക്കുന്നതെന്നും ലോറൻ വീഡിയോയിൽ പറയുന്നു. താന്‍ മരിക്കുകയാണെങ്കില്‍ എല്ലാവരും മരിക്കണമെന്നും യുവതി വീഡിയോയില്‍ പറഞ്ഞു. വീഡിയോ സമൂഹമാധ്യമങ്ങളിൽ വൈറലായതോടെ രൂക്ഷവിമർശനങ്ങളാണ് യുവതിക്കെതിരെ ഉയർന്നത്.

Also Read: ഈ കൊറോണ കാലത്ത് രാജ്യം ഭരിക്കുന്നത് മോദിക്ക് പകരം മൻമോഹൻ സിംഗ് ആയിരുന്നെങ്കിലോ?

ഇതോടെ സംഭവത്തിൽ കേസെടുത്ത് പോലീസ് യുവതിക്കായി തെരച്ചിൽ ആരംഭിച്ചു. തുടർന്ന് ചൊവ്വാഴ്ച ലോറനെ പോലീസ് പിടികൂടുകയായിരുന്നു. അറസ്റ്റ് രേഖപ്പെടുത്തിയ ശേഷം യുവതിയെ ഡെന്റണ്‍ കൗണ്ടി ജയിലിലേക്ക് മാറ്റി. കേസിൽ പതിനഞ്ച് ലക്ഷം രൂപ യുവതിക്ക് പിഴ ചുമത്തിയിട്ടുണ്ടെന്നും പോലീസ് പറഞ്ഞു.

അതേസമയം, യുവതിയെ പരിശോധനയ്ക്ക് വിധേയയാക്കിയെന്നും യുവതിക്ക് കൊറോണ വൈറസ് ബാധയില്ലെന്നും കരോൾട്ടൺ പോലീസ് അറിയിച്ചു. ജയിൽശിക്ഷ കഴിഞ്ഞ് പുറത്തിറങ്ങിയാൽ 21 ദിവസം ക്വറന്റൈനിൽ തുടരണമെന്ന് നിർദ്ദേശിച്ചതായും പോലീസ് വ്യക്തമാക്കി.