കൊവിഡ് 19 സ്ഥിരീകരിച്ച യുവതി ആശുപത്രിയിലെ ശുചിമുറിയിൽ തൂങ്ങിമരിച്ചു

മുംബൈ: മുംബൈയിൽ കൊവിഡ് 19 സ്ഥിരീകരിച്ച ഇരുപത്തിയൊമ്പതുകാരി ജീവനൊടുക്കി. മുംബൈയിലെ ബിവൈഎൽ നായർ ആശുപത്രിയിൽ പ്രവേശിപ്പിച്ച വാര്‍ളി സ്വദേശിയാണ് ആശുപത്രിയിലെ ശുചിമുറിയിക്കുള്ളിൽ തൂങ്ങിമരിച്ചത്. ബുധനാഴ്ച പുലര്‍ച്ചെ നാല് മണിയോടെയായിരുന്നു സംഭവം.

കഴിഞ്ഞ ആഴ്ചയാണ് യുവതിക്ക് കൊറോണ വൈറസ് ബാധയുണ്ടെന്ന് കണ്ടെത്തിയത്. തുടർന്ന് ചികിത്സയ്ക്കായി യുവതിയെ ആശുപത്രിയിൽ പ്രവേശിപ്പിച്ചു. ഇതിനിടെയാണ് ചുരിദാർ ദുപ്പട്ട ഉപയോഗിച്ച് യുവതി ആത്മഹത്യ ചെയ്തത്. സംഭവത്തില്‍ കേസെടുത്ത് അന്വേഷണം ആരംഭിച്ചതായി അഗ്രിപത പോലീസ് അറിയിച്ചു.

Also Read: പിതൃത്വത്തിൽ സംശയം; 20 ദിവസം പ്രായമായ ആൺകുഞ്ഞിനെ യുവാവ് വെട്ടിക്കൊന്നു

ഇന്ത്യയിൽ ഏറ്റവും കൂടുതൽ കൊറോണ വൈറസ് ബാധ റിപ്പോർട്ട് ചെയ്ത സംസ്ഥാനമാണ് മഹാരാഷ്ട്ര. മുംബൈയിലെ വാർളിയിലാണ് ഏറ്റവും കൂടുതൽ വൈറസ് ബാധിതരുള്ളത്. മഹാരാഷ്ട്രയില്‍ ഇതുവരെ രണ്ടായിരത്തിലേറെ പേര്‍ക്കാണ് കോവിഡ്-19 സ്ഥിരീകരിച്ചത്. സംസ്ഥാനത്ത് വൈറസ് ബാധ കാരണം 178 പേർക്കാണ് ഇതുവരെ ജീവൻ നഷ്ടമായത്.