ഹോം സ്‌റ്റേയുടെ മറവില്‍ പെണ്‍വാണിഭം; വര്‍ക്കലയില്‍ അമ്മയും മകളും ഉള്‍പ്പെടെ 8 പേര്‍ അറസ്റ്റില്‍

വര്‍ക്കല: ഹോം സ്‌റ്റേയുടെ മറവില്‍ പെണ്‍വാണിഭം നടത്തിയതില്‍ അമ്മയും മകളും ഉള്‍പ്പെടെ 8 പേര്‍ അറസ്റ്റില്‍. തിരുവനന്തപുരം വര്‍ക്കല കുരയ്ക്കണ്ണിയ്ക്ക് സമീപം പ്രവര്‍ത്തിച്ചിരുന്ന യെല്ലോ ഹോം സ്‌റ്റേയില്‍ നിന്നാണ് സംഘം അറസ്റ്റിലായത്. പോലീസ് നടത്തിയ റെയ്ഡിലായിരുന്നു ഇവരെ പിടികൂടിയത്.

വര്‍ക്കലയില്‍ കെട്ടിടം വാടകയ്ക്ക് എടുത്തായിരുന്നു സംഘത്തിന്റെ ഇടപാട്. ഫോണിലൂടെ ഇടപാടുകാരെ കണ്ടെത്തി ഹോം സ്‌റ്റേയില്‍ എത്തിച്ചുകൊണ്ടായിരുന്നു ഇടപാടുകള്‍ നടത്തിയിരുന്നത്. സംഘത്തിലെ അംഗങ്ങളും ഇടപാടുകാരും ഉള്‍പ്പെടെയാണ് പോലീസ് വലയിലായത്. മൂന്നു സ്ത്രീകളും അറസ്റ്റിലായിട്ടുണ്ട്.

പെരുമ്പുഴ രാജുവിലാസത്തില്‍ രാജി, മകള്‍ ദീപ, വെണ്‍കുളം കളിക്കൂട്ടംവിളയില്‍ ബിന്ദു, കിളിമാനൂര്‍ പുളിമാത്ത് താളിക്കുഴി എസ് ബി ഭവന്‍ ജിഷ്ണു, പാങ്ങോട് കല്ലറ സായൂജ്യ ഭവനില്‍ സാജു, കുരയ്ക്കണ്ണി പറമ്പുവിളയില്‍ നിഷാദ്, ഇടവ പുന്നകുളം ഫാത്തിമ മന്‍സിലില്‍ സുധീര്‍, കുരയ്ക്കണ്ണി ഗായത്രി നിവാസില്‍ അഭിലാഷ് എന്നിവരാണ് അറസ്റ്റിലായത്.

പരവൂര്‍ സ്വദേശി ഗിരീഷും ബിന്ദുവും ചേര്‍ന്നാണ് പ്രധാനമായും ഇടപാടുകള്‍ നടത്തിയിരുന്നത്. ഇടപാടുകള്‍ക്ക് 2000 രൂപ മുതല്‍ 5000 രൂപ വരെ പ്രതിഫലം വാങ്ങിയിരുന്നുവെന്നും നിരവധി കേസുകളില്‍ പ്രതിയായ ഗിരീഷ് ഒളിവില്‍ പോയെന്നും പോലീസ് വ്യക്തമാക്കി.