പീഡനത്തിനിരയായ ആറു വയസ്സുകാരി മരിച്ച സംഭവത്തില്‍ 17 കാരന്‍ അറസ്റ്റില്‍

ദിണ്ടിഗുല്‍: പീഡനത്തിനിരയായ ശേഷം ആറു വയസ്സുകാരി മരിച്ച സംഭവത്തില്‍ 17 കാരന്‍ അറസ്റ്റില്‍. ദിണ്ടിഗുലിലെ വേദാചന്തൂരിലാണ് സംഭവം. പോക്‌സോ നിയമപ്രകാരമാണ് പ്രതിയെ അറസ്റ്റു ചെയ്തതെന്ന് പോലീസ് പറഞ്ഞു.

ഞായറാഴ്ച മുതലാണ് പെണ്‍കുട്ടിയെ കാണാതായത്. വേദാചന്തൂരിനടത്തുള്ള വീടിനടുത്ത് പെണ്‍കുട്ടി കളിക്കുന്നതിനിടയിലാണ് കാണാതായത്. പിന്നീട്, നിരവധി പരിക്കുകളോടെ പെണ്‍കുട്ടിയെ കൃഷിയിടത്തില്‍ കണ്ടെത്തുകയായിരുന്നു. ദിണ്ടിഗുലിലെ സര്‍ക്കാര്‍ ആശുപത്രിയില്‍ നടത്തിയ പോസ്റ്റ്മാര്‍ട്ടത്തില്‍ പെണ്‍കുട്ടി ലൈംഗീകമായി പീഡനത്തിനിരയായതായി പോലീസ് പറഞ്ഞു.

സെക്ഷന്‍ 304 പ്രകാരം കൃഷിയിടത്തിന്റെ ഉടമയായ ഉമാശങ്കറിനെതിരെ കേസെടുത്തിട്ടുണ്ട്. മകളെ ലൈംഗീകമായി പീഡിപ്പിക്കുകയും കൊലപ്പെടുത്തുകയും ചെയ്തുവെന്ന് ആരോപിച്ച് പെണ്‍കുട്ടിയുടെ മാതാപിതാക്കളും ബന്ധുക്കളും പ്രതിയെ ഉടന്‍ അറസ്റ്റു ചെയ്യണമെന്ന് ആവശ്യപ്പെട്ട് പ്രതിഷേധിച്ചു.