കന്യാസ്ത്രീയെ പീഡിപ്പിച്ച കേസ്: ബിഷപ്പ് ഫ്രാങ്കോ മുളക്കലിന്‍റെ ജാമ്യം നീട്ടി

പാലാ: കന്യാസ്ത്രീയെ പീഡിപ്പിച്ച കേസിൽ ബിഷപ്പ് ഫ്രാങ്കോ മുളക്കലിന് പാലാ ജുഡീഷ്യൽ മജിസ്‌ട്രേറ്റ് കോടതി ജാമ്യം നീട്ടി നൽകി. ജൂൺ ഏഴിന് കേസ് വീണ്ടും പരിഗണിക്കും. ഇന്ന് രാവിലെ ബിഷപ്പ് ഫ്രാങ്കോ പാലാ കോടതിയിൽ ഹാജരായി. അന്വേഷണ സംഘം സമർപ്പിച്ച കുറ്റപത്രം കഴിഞ്ഞാഴ്ച കോടതി ഫയലിൽ സ്വീകരിച്ചു.

കുറ്റപത്രവും അനുബന്ധ രേഖകളും ശരിയാണെന്ന് കണ്ടെത്തിയതിനെ തുടർന്നാണ് കോടതി കുറ്റപത്രം സ്വീകരിച്ചത്. ഡിവൈഎസ്‌പി കെ.സുഭാഷിന്റെ നേതൃത്വത്തിലുള്ള അന്വേഷണ സംഘം ഏപ്രിൽ ഒമ്പതിനാണ് കോടതിയിൽ കുറ്റപത്രം സമർപ്പിച്ചത്. കുറ്റപത്രത്തിന്റെയും അനുബന്ധരേഖകളുടെയും പകർപ്പ് പ്രതി ഹാജരായി നൽകിയ ശേഷം കേസ് കോട്ടയം ജില്ലാ കോടതിയിലേക്ക് മാറ്റും. ജലന്ധർ ബിഷപ്പായിരുന്ന ഫ്രാങ്കോ മുളക്കല്‍ കന്യാസ്ത്രീയെ പല തവണ പീഡിപ്പിച്ചെന്നാണ് കേസ്.