കുപ്പയിൽ ഉപേക്ഷിച്ച നവജാതശിശുവിന്റെ മൃതദേഹം തെരുവ് നായകൾ ഭക്ഷിച്ചു

അഹമ്മദാബാദ്: ഗുജറാത്തിൽ കുപ്പയിൽ ഉപേക്ഷിച്ച നവജാതശിശുവിന്റെ മൃതദേഹം തെരുവ് നായകൾ ഭക്ഷിച്ചു. അഹമ്മദാബാദിലെ വസ്ന പ്രദേശത്ത് ബുധനാഴ്ചയായിരുന്നു സംഭവം. സൊരായി നഗർ സ്വദേശിയായ നളിനി ദന്താനിയ (50)യാണ് പെൺകുഞ്ഞിന്റെ മൃതദേഹാവശിഷ്ടങ്ങൾ തെരുവുനായകൾ ഭക്ഷിക്കുന്നത് കണ്ടത്.

ഇവർ പിന്നീട് നാട്ടുകാരെയും പോലീസിനേയും വിവരമറിയിക്കുകയായിരുന്നു. തുടർന്ന് പോലീസ് സ്ഥലത്തെത്തി അന്വേഷണം നടത്തി. വീടിന് സമീപത്തുള്ള മറ്റൊരു വീട്ടിൽനിന്ന് ബുധനാഴ്ച ദുർഗന്ധം വമിച്ചിരുന്നതായി നളിനി പോലീസിനെ അറിയിച്ചു. ഇതിനെ തുടർന്ന് പരിശോധിക്കാനിറങ്ങിയപ്പോഴാണ് പെൺകുഞ്ഞിന്റെ മൃതദേഹം അതേ വീടിന്റെ സമീപത്തെ കുപ്പയിൽനിന്ന് തെരുവ് നായകൾ കടിച്ചുകീറി കഴിക്കുന്നത് കണ്ടതെന്നും അവർ പോലീസിനോട് പറഞ്ഞു.

Also Read: ദമ്പതികളുടെ കിടപ്പുമുറിയിൽ ഒളിഞ്ഞുനോക്കിയ 17കാരൻ അറസ്റ്റിൽ

സംഭവത്തിൽ വസ്ന പോലീസ് കേസെടുത്ത് അന്വേഷണം ആരംഭിച്ചു. കുഞ്ഞിന്റെ മൃതദേഹം എങ്ങനെ കുപ്പയിലെത്തിയെന്നതിനെ അടിസ്ഥാനപ്പെടുത്തിയാണ് അന്വേഷണം. മൃതദേഹം ആരെങ്കിലും കുപ്പയിൽ ഉപേക്ഷിച്ചതാകാം എന്നാണ് പോലീസിന്റെ പ്രാഥമിക നിഗമനം.

ജനുവരിയിൽ ഉത്തർപ്രേദശിലും സമാനസംഭവം റിപ്പോർട്ട് ചെയ്തിരുന്നു. ഫറൂഖാബാദിലെ ഒരു സ്വകാര്യ ആശുപത്രിയിലെ ഓപ്പറേഷൻ തിയേറ്ററിൽനിന്ന് തെരുവ് നായ നവജാതശിശുവിനെ കടിച്ച് കൊലപ്പെടുത്തിയത് വലിയ വാർത്തയായിരുന്നു. പ്രസവശേഷം അമ്മയെയും കുഞ്ഞിനെയും വാർഡിലേക്ക് മാറ്റുന്നതിനിടെയായിരുന്നു സംഭവം.