'കുട്ടിയില്ലായിരുന്നെങ്കില് ശരണ്യയെ വിവാഹം കഴിക്കാം'
തയ്യിലില് പിഞ്ചുകുഞ്ഞിനെ കൊലപ്പെടുത്തിയ കേസില് കുട്ടിയില്ലായിരുന്നെങ്കില് ശരണ്യയെ വിവാഹം കഴിക്കാമെന്ന് കാമുകന് നിതിന് പറഞ്ഞിരുന്നു. ഇതു സംബന്ധിച്ച തെളിവുകള് പോലീസിന് ലഭിച്ചു. നിതിനുമൊപ്പമുള്ള ജീവിതത്തില് കുഞ്ഞ് ഒരു ഭാരമായി ശരണ്യ കാണുകയും തുടര്ന്ന്, കൊല്ലാന് പദ്ധതിയിടുകയുമായിരുന്നു. കുഞ്ഞിനെ കൊലപ്പെടുത്തി അത് ഭര്ത്താവ് പ്രണവിന്റെ തലയില് കെട്ടിവെച്ച് നിതിനുമായി ഒരുമിച്ച് ജീവിക്കാനുള്ള ശ്രമമാണ് നടത്തിയതെന്ന് പോലീസ്.
തുടര്ച്ചയായ മൂന്നാം ദിനവും ചോദ്യം ചെയ്യല്, ഒടുവില് കുറ്റസമ്മതം
ശരണ്യയുടെ കാമുകന് നിതിനെ മൂന്നു ദിവസം തുടര്ച്ചയായി ചോദ്യം ചെയ്ത ശേഷമാണ് അറസ്റ്റ് രേഖപ്പെടുത്തിയത്. പോലീസ് കസ്റ്റഡിയിലുള്ള ശരണ്യ കാമുകനെതിരെ മൊഴി നല്കി. ഇതിന്റെ അടിസ്ഥാനത്തിലാണ് നിതിനെ പോലീസ് ഇന്നലെ അറസ്റ്റു ചെയ്തത്. ചോദ്യം ചെയ്യലിനൊടുവില് നിതിന് കുഞ്ഞിന്റെ കൊലപാതകത്തിന് കൂട്ടുനിന്നെന്ന് പോലീസിന് മൊഴി നല്കി.
നിര്ണ്ണായകമായത് വാട്സാപ്പ്, ഫേസ്ബുക്ക് ചാറ്റുകള്
കാമുകന് നിതിനെ കുടുക്കിയത് ശരണ്യയുടെ മൊഴി മാത്രമല്ല. സാഹചര്യ തെളിവുകള്ക്കൊപ്പം ഇരുവരും തമ്മിലുള്ള വാട്സാപ്പ്, ഫേസ്ബുക്ക് ചാറ്റുകളില് നിന്നും ലഭിച്ച നിര്ണായക തെളിവുകള് കൂടിയാണ്. കുട്ടിയില്ലായിരുന്നെങ്കില് വിവാഹം കഴിച്ചേനെ എന്നതടക്കമുള്ള കാര്യങ്ങള് ഇരുവരുടെയും ചാറ്റിങ്ങില് നിന്നും ലഭിച്ചെന്നാണ് റിപ്പോര്ട്ട്.
ലൈംഗിക- സാമ്പത്തിക ചൂഷണം; കൂടുതല് വിവരങ്ങള് പുറത്ത്
ശരണ്യ ഏറെക്കാലമായി കാമുകനായ നിതിന്റെ നിയന്ത്രണത്തിലായിരുന്നു. ലൈംഗിക ചൂഷണത്തിനു പുറമെ നിതിന് സാമ്പത്തികമായും ശരണ്യയെ ചൂഷണം ചെയ്തിരുന്നു. ശരണ്യയുടെ വീടിനു സമീപത്തെ സഹകരണബാങ്കില് നിന്നു ശരണ്യയുടെ പേരില് ഒരു ലക്ഷം രൂപ വായ്പ എടുപ്പിക്കാനുള്ള ശ്രമം നടന്നുവരികയായിരുന്നു. ഇതിന്റെ രേഖകള് നിതിന്റെ വീട്ടില് നിന്ന് കണ്ടെത്തി. ശരണ്യയുടെ ബ്രേസ്ലെറ്റുള്പ്പെടെയുള്ള സ്വര്ണാഭരണങ്ങള് നിതിന് സ്വന്തമാക്കിയിരുന്നെന്ന് പോലീസ് സൂചിപ്പിച്ചു.
കൊലപാതകത്തിന് തലേദിവസം നിതിന് ശരണ്യയുടെ വീട്ടില് പോയതിന് തെളിവ്
വിയാന്റെ കൊലപാതകത്തിന് തലേ ദിവസം രാത്രി ഒരു മണിക്ക് ശരണ്യയെ കാണാന് വീട്ടില് പോയിരുന്നെന്ന് നിതിന് ചോദ്യം ചെയ്യലില് സമ്മതിച്ചു. ഇതുസംബന്ധിച്ച സിസിടിവി ദൃശ്യങ്ങള് പോലീസിന് ലഭിച്ചു. ഫെബ്രുവരി 17 നാണ് പുലര്ച്ചെയാണ് വിയാനെ അമ്മ ശരണ്യ കടല്ഭിത്തിയില് എറിഞ്ഞ് കൊലപ്പെടുത്തിയത്. അന്നേദിവസം തന്നെ ശരണ്യയെ പോലീസ് അറസ്റ്റു ചെയ്തിരുന്നു. ശരണ്യയുടെ അറസ്റ്റ് കഴിഞ്ഞ് ഒരാഴ്ച പിന്നിടുമ്പോഴാണ് നിതിന്റെ അറസ്റ്റ്.