അമേരിക്കൻ അതിർത്തിയിൽ മൃതദേഹം: ഇന്ത്യൻ ബാലികയുടേതെന്ന് സംശയം

വാഷിങ്‍ടൺ: മെക്സിക്കോ - അമേരിക്ക രാജ്യാന്തര അതിർത്തിയിൽ ഏഴു വയസുകാരിയുടെ മൃതദേഹം കണ്ടെത്തി. ഇന്ത്യൻ വംശജയായ ബാലികയുടെ മൃതദേഹമായിരിക്കാം ഇതെന്ന് പോലീസ് സംശയിക്കുന്നു. അതിർത്തിയിൽ പട്രോളിങ്ങിന് പോയ പോലീസ് ഉദ്യോഗസ്ഥരാണ് മൃതദേഹം കണ്ടെത്തിയത്.

ലുക്‌വില്ലേക്ക് സമീപമുള്ള അരിസോണ - മെക്സിക്കോ അതിർത്തി മേഖലയിലാണ് മൃതദേഹം കണ്ടെത്തിയത്. അനധികൃത കുടിയേറ്റക്കാരുടെ സംഘത്തിൽ ഉൾപ്പെട്ടതാവാം കുട്ടിയും എന്നാണ് പോലീസുകാരുടെ നിഗമനം.

ഇന്ത്യൻ വംശജയായ ഒരു സ്ത്രീയും രണ്ടു കുട്ടികളും തങ്ങൾക്കൊപ്പമുണ്ടായിരുന്നെന്ന് രണ്ടു സ്ത്രീകൾ പോലീസുകാരോട് വെളിപ്പെടുത്തി. ടക്സൺ മേഖലയിൽ നിന്നുള്ള സ്ത്രീകളെയാണ് പോലീസ് ചോദ്യം ചെയ്തത്. അന്താരാഷ്ട്ര അതിർത്തിയിൽ കൂടുതൽ കുടിയേറ്റക്കാരുണ്ടോ എന്ന് കണ്ടെത്താൻ തെരച്ചിൽ ഊർജ്ജിതമാക്കി.