ബോയ‍്‍സ് ലോക്കർ റൂമിലെ ബലാത്സംഗ പരാമ‍‍ർശം; ആ ചാറ്റിന് പിന്നിൽ പെൺകുട്ടി, പുതിയ ട്വിസ്റ്റുമായി പോലീസ്!

കേസുമായി ബന്ധപ്പെട്ട് ഇത് വരെ രണ്ട് പേരെയാണ് ഡൽഹി പോലീസ് അറസ്റ്റ് ചെയ്തത്. ആദ്യം 15 വയസ്സുകാരനായ വിദ്യാർഥിയാണ് അറസ്റ്റിലായത്. ഗ്രൂപ്പിൻെറ ഫോൺ നമ്പർ രജിസ്റ്റർ ചെയ്തത് ഈ വിദ്യാർഥിയുടെ പേരിലായിരുന്നു. പിന്നീട് ഗ്രൂപ്പ് അഡ്മിനെയും പോലീസ് അറസ്റ്റ് ചെയ്തു. ഇവരിൽ നിന്ന് ഗ്രൂപ്പിലെ മറ്റ് അംഗങ്ങളുമായി ബന്ധപ്പെട്ടും അന്വേഷണം നടക്കുകയാണ്. ഈ അധ്യയന വർഷം പന്ത്രണ്ടാം ക്ലാസ്സ് പരീക്ഷ എഴുതിയ ഒരു വിദ്യാർഥിയാണ് അറസ്റ്റിലായവരിൽ ഉള്ള ഒരാൾ.

കേസിൽ പുതിയ വഴിത്തിരിവ് ഉണ്ടായിരിക്കുകയാണ് ഇപ്പോൾ. സഹപാഠിയെ ബലാത്സംഗം ചെയ്യുന്നതിനുള്ള പദ്ധതി തയ്യാറാക്കുന്ന തരത്തിലുള്ള ചാറ്റിൻെറ സ്ക്രീൻ ഷോട്ട് പുറത്ത് വന്നിരുന്നു. എന്നാൽ ആ സ്ക്രീൻ ഷോട്ടിനും ചാറ്റിനും ഈ ഗ്രൂപ്പുമായി ബന്ധമൊന്നുമില്ലെന്നാണ് ഇപ്പോൾ പോലീസ് പറയുന്നത്. ഒരു പെൺകുട്ടി ആൺകുട്ടിയുടെ പേരിൽ ഫേക്ക് ഐഡി ഉണ്ടാക്കി മറ്റൊരു ആൺകുട്ടിയുമായി നടത്തിയ ചാറ്റിലെ സ്ക്രീൻ ഷോട്ടാണ് പുറത്ത് വന്നതെന്നാണ് പോലീസ് പറയുന്നത്. രണ്ട് പേർക്കും ബോയ്സ് ലോക്കർ റൂമുമായി ബന്ധമില്ലെന്നുമാണ് പോലീസിൻെറ വെളിപ്പെടുത്തൽ.

ഇൻസ്റ്റഗ്രാമിൽ അല്ല, സ്നാപ് ചാറ്റിലാണ് ആ ചാറ്റ് നടന്നത്. സിദ്ദാർഥ് എന്ന പേരിൽ ഫേക്ക് ഐഡി ഉണ്ടാക്കിയ പെൺകുട്ടി, ആൺകുട്ടിയെ പരീക്ഷിക്കാൻ വേണ്ടിയാണ് ചോദ്യങ്ങൾ ചോദിച്ച് തുടങ്ങിയത്. പെൺകുട്ടി തന്നെ ഉണ്ടാക്കിയതാണ് ഈ ബലാത്സംഗ പദ്ധതിയുടെ ചാറ്റെന്നാണ് പോലീസ് പറയുന്നത്. ഇത്തരം കാര്യങ്ങൾ പറയുമ്പോൾ എങ്ങനെയായിരിക്കും അപ്പുറത്തുള്ള ആൺകുട്ടി പ്രതികരിക്കുക എന്നറിയാനായിരുന്നുവത്രേ ഈ നീക്കം. ഈ ആൺകുട്ടിക്കെതിരെയും പെൺകുട്ടിക്കെതിരെയും കേസ് രജിസ്റ്റർ ചെയ്തിട്ടില്ലെന്ന് പോലീസ് പറഞ്ഞു.

ഫേക്ക് ഐഡിയിലൂടെ ഒരു പെൺകുട്ടി ഉണ്ടാക്കിയ ചാറ്റാണ് പ്രചരിക്കുന്നതെന്ന് പോലീസ് പറയുന്നു. ബലാത്സംഗ ചർച്ചയിൽ ആൺകുട്ടി താൽപര്യം കാണിച്ചില്ല. സ്നാപ് ചാറ്റിൽ സിദ്ദാർഥ് എന്ന ഐഡിയുമായുള്ള ബന്ധവും ഉപേക്ഷിച്ചിരുന്നു. പിന്നീട് ഈ ആൺകുട്ടി തന്നെ മറ്റൊരു ഗ്രൂപ്പിൽ ഈ സ്ക്രീൻ ഷോട്ട് ഇടുകയായിരുന്നു. ഇവിടെ നിന്നുമാണ് ഈ ചാറ്റ് പുറത്തായത്. ആൺകുട്ടിയുടെ ഒരു പെൺ സുഹൃത്ത് തന്നെയാണ് ബോയ്സ് ലോക്കർ റൂമുമായി ബന്ധപ്പെടുത്തി ഈ ചാറ്റ് പ്രചരിപ്പിച്ചതെന്നും പോലീസ് പറഞ്ഞു.