ഡോക്ടറുടെ കൊലപാതകം; പ്രതി മഹേഷ് പിടിയിൽ

തൃശൂർ: വനിതാ ഡോക്ടറെ കുത്തി കൊലപ്പെടുത്തിയ കേസിൽ പാവറട്ടി സ്വദേശി മഹേഷ് അറസ്റ്റിൽ. ഡോക്ടർക്കൊപ്പം താമസിച്ചിരുന്നയാളും ബിസിനസ് പാർട്ണറുമാണ് മഹേഷ്. മൂവാറ്റുപുഴ വലിയകുളങ്ങര സ്വദേശി ജോസിന്റെ മകൾ ഡോ സോനക്ക് (30) ചൊവ്വാഴ്ചയാണ് ക്ലിനിക്കിൽ വെച്ച് കുത്തേറ്റത്. ചികിത്സയിലായിരിക്കെ കഴിഞ്ഞ ഞായറാഴ്ചയാണ് സോന മരണത്തിന് കീഴടങ്ങിയത്.

Also Read: ക്ലൈമാക്‌സില്‍ സുഹൃത്ത് വില്ലനായി; വനിതാ ഡോക്ടര്‍ക്ക്‌ നഷ്ടമായത്‌ സ്വന്തം ജീവന്‍!! അക്രമം ആസൂത്രിതം

ഒളിവിലായിരുന്ന പ്രതി മഹേഷിനെ തൃശൂർ കൂർച്ചഞ്ചേരിയിലെ സുഹൃത്തിന്റെ വീട്ടിൽ നിന്നാണ് പോലീസ് പിടികൂടിയത്. കുട്ടനെല്ലൂരിൽ ദ ഡെന്റസ്റ്റ് ക്ളിനിക്ക് നടത്തുകയായിരുന്നു ഡോ സോനയും മഹേഷും. മഹേഷുമായി ഉണ്ടായ സാമ്പത്തിക ഇടപാടുകൾ സംബന്ധിച്ച തർക്കത്തെ തുടര്‍ന്ന് സോന പൊലീസിന് പരാതി നൽകിയിരുന്നു. ഇതുമായി ബന്ധപ്പെട്ട മധ്യസ്ഥ ചർച്ചകൾക്കിടെയാണ് പ്രതി സോനയെ കുത്തിയത്. വിവാഹ ബന്ധം വേർപിരിഞ്ഞ് കഴിയുന്ന ഡോക്ടര്‍ രണ്ട് വര്‍ഷമായി മഹേഷിനൊപ്പം ഫ്ളാറ്റിലാണ് കഴിഞ്ഞിരുന്നത്.

Also Read: തൃശൂരിൽ ക്ലിനിക്കിൽ വെച്ച് കുത്തേറ്റ വനിതാ ഡോക്ടർ മരിച്ചു, പ്രതിയായ സുഹൃത്ത് ഒളിവിൽ

ക്ലിനിക്കിന്റെ ഇന്റീരിയർ ഡിസൈൻ ചെയ്തത് മഹേഷായിരുന്നു. ഏഴ് ലക്ഷം രൂപയുടെ പണി നടത്തിയതിന് പലപ്പോഴായി 22 ലക്ഷം രൂപ പ്രതി സോനയിൽ നിന്നും തട്ടിയെടുത്തു. ഇതുമായി ബന്ധപ്പെട്ട് ഒല്ലൂർ പോലീസിനാണ് സോന പരാതി നൽകിയത്.