കർണാടകയിലെ അധോലോക നായകൻ മുത്തപ്പ റായ് മരിച്ചു

ബെംഗളൂരു: കര്‍ണാടകയിലെ അധോലോക നായകനായിരുന്ന എന്‍ മുത്തപ്പ റായ് മസ്തിഷ്ക അർബുദത്തെ തുടർന്ന് മരിച്ചു. 68 വയസായിരുന്നു. ആരോഗ്യനിലവഷളായതിനെ തുടർന്ന് വ്യാഴാഴ്ച രാത്രി മുത്തപ്പയെ ആശുപത്രിയിൽ പ്രവേശിപ്പിക്കുകയായിരുന്നു. മണിപ്പാലിലെ സ്വകാര്യ ആശുപത്രിയില്‍ ചികിത്സയിലിരിക്കെ വെള്ളിയാഴ്ചയാണ് മുത്തപ്പ മരണത്തിന് കീഴടങ്ങിയത്. ജനുവരിയില്‍ താന്‍ അർബുദരോഗ ബാധിതനാണെന്ന കാര്യം ലോകത്തോട് അദ്ദേഹം വെളിപ്പെടുത്തിയിരുന്നു.

തുളു ഭാഷ ന്യൂനപക്ഷ കുടുംബത്തില്‍ ദക്ഷിണ കന്നഡയിലെ പുത്തൂരിലാണ് മുത്തപ്പ റായ് ജനിച്ചത്. യുവാവായിരിക്കെ തന്നെ കുറ്റകൃത്യങ്ങളുടെ ലോകത്തെ പ്രധാനിയായി അദ്ദേഹം മാറിയിരുന്നു. നിരവധി ക്രമിനൽ കുറ്റകൃത്യങ്ങളിൽ പ്രതിയായ മുത്തപ്പ കേന്ദ്ര-സംസ്ഥാന അന്വേഷണ ഏജൻസികളുടെ കണ്ണിലെ കരടായിരുന്നു. കൊലപാതകം, ഗൂഢാലോചന തുടങ്ങി നിരവധി കേസുകളില്‍ മുത്തപ്പയ്‌ക്കെതിരെ അറസ്റ്റ് വാറണ്ടുകള്‍ പുറപ്പെടുവിച്ചിരുന്നു.

ബെംഗളൂരുവിലെ ഒരു ബാങ്കിൽ ജീവനക്കാരനായി ജീവിതം തുടങ്ങിയ മുത്തപ്പ പതിയെ ഡാൻസ് ബാറുകളുടെയും റസ്റ്റോറന്റുകളുടെയും മുതലാളിയായി വളരുകയായിരുന്നു. രാജ്യം വിട്ട മുത്തപ്പയെ പാസ്പോർട്ട് കേസിൽ 2002-ല്‍ യുഎഇ ഇന്ത്യയിലേക്ക് തിരികെ നാടുകടത്തിയിരുന്നു. മറ്റൊരു അധോലോക നായകനായ ദാവൂദ് ഇബ്രാഹിമുമായുള്ള ബന്ധത്തെക്കുറിച്ചറിയുന്നതിനായി സിബിഐ, ഇന്റലിജന്‍സ് ബ്യൂറോ, റോ, കര്‍ണാടക പോലീസ്, ഐബി തുടങ്ങി നിരവധി ഏജന്‍സികള്‍ ഇയാളെ ചോദ്യം ചെയ്തിരുന്നു. ഈ വർഷം ഫെബ്രുവരിയിൽ സെനഗലിൽ നിന്ന് ഇന്ത്യയിലേക്ക് നാടുകടത്തപ്പെട്ട അധോലോക നായകൻ രവി പൂജാരിയുമായുള്ള ബന്ധത്തെച്ചൊല്ലിയും ഏപ്രിലിൽ ക്രൈംബ്രാഞ്ച് അധികൃതർ മുത്തപ്പയെ രണ്ട് മണിക്കൂർ ചോദ്യം ചെയ്തിരുന്നു.

Also Read: അമ്മ വായിൽ തുണി തിരുകി, പിതാവ് പീഡിപ്പിച്ചു; മാതാപിതാക്കളുടെ ക്രൂരത വെളിപ്പെടുത്തി പതിനെട്ടുകാരി

കുറ്റകൃത്യങ്ങളിൽ മാനസാന്തരപ്പെട്ട മുത്തപ്പ 'ജയ കര്‍ണാടക' എന്ന പേരില്‍ സന്നദ്ധ സംഘടന രൂപീകരിച്ചിരുന്നു. ഇതുകൂടാതെ തുളു, കന്നഡ സിനിമകളിലും മുത്തപ്പ അഭിനയിച്ചിട്ടുണ്ട്. മുത്തപ്പയുടെ ജീവിതം ആസ്പദമാക്കി ബോളിവുഡ് സംവിധായകൻ രാം ഗോപാല്‍ വര്‍മ സിനിമ കഥയെഴുതി സംവിധാനം ചെയ്തിരുന്നെങ്കിലും ഇതുവരെ തിയേറ്ററുകളിൽ പ്രദർശനത്തിനെത്തിയിട്ടില്ല. മംഗളൂരു, ബെംഗളൂരു, മുംബൈ, ദുബായ്, ലണ്ടൻ എന്നിവിടങ്ങളിലായിരുന്നു സിനിമ ചിത്രീകരിച്ചിരുന്നത്.