ലോക്ക് ഡൗണിനിടെ പുറത്തിറങ്ങിയത് ചോദ്യം ചെയ്ത ജവാനെ എച്ച്ഐവി ബാധിതൻ കടിച്ചു

സൂറത്ത്: ഗുജറാത്തിൽ ലോക്ക് ഡൗണിനിടെ പുറത്തിറങ്ങിയത് ചോദ്യം ചെയ്ത സിഐഎസ്എഫ് ജവാനെ എച്ച്ഐവി ബാധിതൻ കടിച്ചു. സൂറത്തിലെ രാംനഗറിൽ ചൊവ്വാഴ്ച വൈകീട്ടായിരുന്നു സംഭവം. കേസിൽ പ്രതിയായ 42കാരനെ പോലീസ് അറസ്റ്റ് ചെയ്തു.

കൊറോണ വൈറസിന്റെ വ്യാപനം തടയുന്നതിനായി പ്രഖ്യാപിച്ച ലോക്ക് ഡൗൺ നിർദ്ദേശങ്ങൾ ലംഘിച്ച് റോഡിൽ കറങ്ങിനടന്ന പ്രതിയെ പോലീസ് തടഞ്ഞുവച്ച് ചോദ്യം ചെയ്യുകയായിരുന്നു. ക്രോസ്റോഡിന് സമീപമുള്ള റോഡിൽ വച്ചായിരുന്നു പ്രതിയെ പോലീസ് പിടികൂടിയത്. പരിശോധനക്കിടെ പോലീസിന്റെ കയ്യിൽനിന്നും പ്രതി ഓടിരക്ഷപ്പെട്ടു. ഇതിനിടെ ഇയാളെ പിടിക്കാൻ പുറകെ ഓടിയ ജവാന്റെ വിരലിൽ പ്രതി കടിക്കുകയായിരുന്നു.

Also Read: ലോക്ക് ഡൗണിനിടെ വീഞ്ഞപ്പെട്ടിയിൽ ഒളിച്ചുകടന്ന 34 തൊഴിലാളികൾ പിടിയിൽ

സംഭവത്തിൽ വധശ്രമത്തിന് കേസെടുത്ത് പ്രതിയെ പോലീസ് അറസ്റ്റ് ചെയ്തു. സ്റ്റേഷനിൽ ഹാജരാക്കിയ പ്രതി ചോദ്യംചെയ്യലിലാണ് താൻ എച്ച്ഐവി ബാധിതനാണെന്ന കാര്യം വെളിപ്പെടുത്തിയത്. പ്രതിയെ കൊറോണ വൈറസ് പരിശോധനയ്ക്കായി ആശുപത്രിയിൽ പ്രവേശിപ്പിച്ചു. കാണ്ട്ല പോർട്ടിൽനിന്നുള്ള ജവാനാണ് ആക്രമണത്തിനിരയായത്. ഇയാളെ ന്യൂ സിവിൽ ആശുപത്രിയിൽ പ്രവേശിപ്പിക്കുകയും വൈദ്യപരിശോധനയ്ക്ക് വിധേയനാക്കുകയും ചെയ്തു.