അമ്മയുടെ മരണത്തിൽ സന്തോഷിച്ചെന്ന് തോന്നൽ: ഭർത്താവ് ഭാര്യയെ കൊന്നു

മുംബൈ: അമ്മ മരിച്ചതിൽ ഭാര്യ സന്തോഷിച്ചെന്ന സംശയത്തിൽ ഭർത്താവ് ഭാര്യയെ കൊലപ്പെടുത്തി. 35 കാരിയായ ശുഭാംഗി ലോഖണ്ഡെയെയാണ് ഭർത്താവ് സന്ദീപ് ലോഖണ്ഡെ കൊന്നത്. സന്ദീപിന്റെ അമ്മ കഴിഞ്ഞ വെള്ളിയാഴ്ച മരിച്ചത് മുതൽ ശുഭാംഗി സന്തോഷിക്കുന്നുണ്ടെന്നായിരുന്നു ഇയാളുടെ തോന്നൽ.

70 കാരിയായ അമ്മ മാലതി ലോഖണ്ഡെ മരിച്ചത് മുതലുള്ള ശുഭാംഗിയുടെ പെരുമാറ്റം ഏറെ സംശയമുളവാക്കിയതായി സന്ദീപ് പോലീസിനോട് പറഞ്ഞു. ഭർതൃ മാതാവ് മരിച്ചതിലുള്ള ദുഃഖം താങ്ങാനാവാതെ ശുഭാംഗി വസതിയുടെ രണ്ടാം നിലയിൽ നിന്ന് ചാടി ആത്മഹത്യാ ചെയ്‌തെന്നായിരുന്നു ആദ്യത്തെ പുറത്ത് വന്ന വാർത്ത.

സംശയം തോന്നിയ പോലീസ് സന്ദീപിനെ കൂടുതൽ ചോദ്യം ചെയ്തതോടെയാണ് സത്യം പുറത്ത് വന്നത്. അമ്മ മരിച്ചത് മുതൽ ശുഭാംഗിയുടെ മുഖത്ത് പ്രകടമായ വ്യത്യാസം ഉണ്ടായിരുന്നെന്നും അവർ സന്തോഷിക്കുന്നതായി അനുഭവപ്പെട്ടെന്നും സന്ദീപ് പോലീസിനോട് പറഞ്ഞു. ഇത് തന്നെ പ്രകോപിപ്പിച്ചെന്നും തുടർന്നാണ് ശുഭാംഗിയെ കെട്ടിടത്തിന് മുകളിൽ നിന്ന് തള്ളിയിട്ട് കൊന്നതെന്നും സന്ദീപ് പോലീസിനോട് വെളിപ്പെടുത്തി.