മന്ത്രവാദിയുമായി ലൈംഗികബന്ധത്തിന് വിസമ്മതിച്ച ഭാര്യയെ ഭർത്താവ് കൊന്നു

അലിഗഡ്: ഉത്തർപ്രദേശിലെ അലിഗഡിൽ മന്ത്രവാദിയുമായി ലൈംഗികബന്ധത്തിന് വിസമ്മതിച്ച ഭാര്യയെ ഭർത്താവ് കൊലപ്പെടുത്തി. ക്രിമിനൽ പശ്ചാത്തലമുള്ള മന്ത്രവാദിയുമായി ലൈംഗിക ബന്ധത്തിൽ ഏർപ്പെടാൻ ഭർത്താവ് ഏറെ കാലമായി ഭാര്യയെ നിർബന്ധിച്ചിരുന്നുവെന്ന് യുവതിയുടെ സഹോദരൻ പോലീസിൽ മൊഴി നൽകി.

മാൻപാൽ യാദവ് എന്ന വ്യക്തിയാണ് ഭാര്യയെ നദിയിൽ മുക്കി കൊന്നതിന് അറസ്റ്റിലായത്. പിതാവ് അമ്മയെ നദിയിൽ മുക്കി കൊല്ലുന്നത് മകൻ കണ്ടിരുന്നു.എന്നാൽ, സംഭവം പുറത്ത് പറഞ്ഞാൽ കൊന്നു കളയുമെന്ന് ഇയാൾ മകനെ ഭീഷണിപ്പെടുത്തി.

കേസിൽ മാൻപാൽ യാദവ്, മന്ത്രവാദി സാന്താദാസ് ദുർഗാദാസ് എന്നിവർ അറസ്റ്റിലായി. വൻ തോതിൽ ഹെറോയിൻ കൈവശം വെച്ചതിന് സാന്താദാസ് ദുർഗാദാസ് നേരത്തെ അറസ്റ്റിലായിരുന്നു. യുവതിയുടെ സഹോദരൻ നൽകിയ പരാതിയിന്മേലാണ് പോലീസ് ഇരുവരെയും അറസ്റ്റ് ചെയ്തത്.

യുവതിയെ കൊന്ന ശേഷം ഇരുവരും നദി നീന്തി കടന്ന് അടുത്ത ജില്ലയായ ബദാവുനിലേക്ക് രക്ഷപെടാൻ ശ്രമിച്ചു. ഭർത്താവ് മന്ത്രവാദിയുമായി ബന്ധപ്പെടാൻ തന്നെ നിർബന്ധിക്കുന്നുവെന്ന് യുവതി സഹോദരനോട് നേരത്തെ പരാതി പറഞ്ഞിരുന്നു. തുടർന്ന്, സഹോദരൻ യുവതിയുടെ വീട്ടിൽ എത്തിയിരുന്നു. ഇയാൾ തിരികെ പോയ ശേഷമാണ് മാൻപാൽ യാദവ് ഭാര്യയെ നദിയിലേക്ക് കൂട്ടിക്കൊണ്ടു പോയി മുക്കി കൊന്നത്.