ഇന്ത്യൻ വംശജനായ ബാർ ഉടമ കാലിഫോർണിയയിൽ വെടിയേറ്റ് മരിച്ചു

ഡൗണി: കാലിഫോർണിയയിൽ ഇന്ത്യൻ വംശജനായ മദ്യവില്പനശാല ഉടമ വെടിയേറ്റ് മരിച്ചു. മെയ് ഏഴിനായിരുന്നു ഡൗണി പാരമൗണ്ട് ബിലവഡിലുള്ള മദ്യവിൽപനശാലയിൽ വെച്ച് വെടിവെപ്പ് നടന്നത്. കടയുടെ ഉടമയായ ഗുർപ്രീത് സിങ് (44) ആണ് കൊല്ലപ്പെട്ടത്.

സമീപത്തുള്ള സിസിടിവി ദൃശ്യത്തിൽ ഒരാൾ കടയിൽ നിന്ന് ഓടിപ്പോകുന്നത് കാണാം. ജോലിക്കാർ ആരും കടയിൽ ഇല്ലാതിരുന്ന സമയത്താണ് സിങ്ങിന് വെടിയേറ്റത്. രാത്രി 11 മണിയോടെയാണ് ആക്രമണം നടന്നത്. സംഭവത്തിന് ദൃക്‌സാക്ഷികളുണ്ടെങ്കിൽ പോലീസുമായി ബന്ധപ്പെടണമെന്ന് ഡൗണി പോലീസ് ഡിറ്റക്റ്റീവ് റിച്ചാർഡ് ഗാർസിയ അറിയിച്ചു.കവർച്ചാ ശ്രമത്തിനിടെ മോഷ്ടാവ് സിങ്ങിനെ കൊലപ്പെടുത്തിയതാകാമെന്നാണ് പോലീസ് നിഗമനം.