ജില്ലാ ജഡ്ജി ഓട്ടോയിടിച്ച് മരിച്ചു; കൊലപാതകമെന്ന് സംശയം; വീഡിയോ പുറത്ത്

കഴിഞ്ഞ ദിവസം പ്രഭാത സവാരി നടത്തുന്നതിനിടെയാണ് ഉത്തം ആനന്ദിനെ വാഹനം ഇടിച്ചത്. വീടിന് അര കിലോമീറ്റർ അകലെ ജഡ്ജി അജ്ഞാത വാഹനം ഇടിച്ച് മരിച്ചെന്നായിരുന്നു പോലീസിന്റെ വിശദീകരണം. എന്നാൽ സിസിടിവി ദൃശ്യങ്ങൾ പരിശോധിച്ചപ്പോഴാണ് അപകടമരണം കൊലപാതകമാണെന്ന സംശയത്തിന് ഇട നൽകിയത്. രാവിലെ അഞ്ച് മണിക്കാണ് സംഭവം നടന്നത്.

തിരക്കില്ലാത്ത റോഡിന്റെ അരികുപറ്റി നടക്കുകയായിരുന്നു ജഡ്ജിയെ പിന്നാലെ വന്ന ഓട്ടോ ഇടിക്കുകയായിരുന്നു. തുടർന്ന് വാഹനം നിർത്താതെ പോയി. മറ്റ് വാഹനങ്ങളൊന്നും സംഭവ സമയം റോഡിൽ ഉണ്ടായിരുന്നില്ല. വളവു തിരിഞ്ഞെത്തിയ ഓട്ടോ ജഡ്ജിയെ ലക്ഷ്യമാക്കി നീങ്ങുന്നത് ദൃശ്യങ്ങളിൽ വ്യക്തമാണ്. കൊലപാതകികൾ ഉത്തം ആനന്ദിനെ മനപ്പൂർവ്വം വാഹനം ഇടിപ്പിക്കുകയായിരുന്നുവെന്നാണ് പോലീസ് സംശയിക്കുന്നത്.

അപകടമുണ്ടാക്കിയ വാഹനം മോഷ്ടിക്കപ്പെട്ടതാണെന്നാണ് പോലീസിന്റെ കണ്ടെത്തൽ. സംഭവം നടക്കുന്നതിന്റെ മണിക്കൂറുകൾക്കു മുമ്പായിരുന്നു മോഷണം. ജഡ്ജി കൈകാര്യം ചെയ്തിരുന്ന കേസുകൾ കേന്ദ്രീകരിച്ചാണ് പോലീസ് അന്വേഷണം നടത്തുന്നത്. അടുത്തയിടെ രണ്ട് പ്രധാന ഗുണ്ടാത്തലവന്മാരുടെ ജാമ്യാപേക്ഷ ജഡ്ജി നിഷേധിച്ചിരുന്നു. ഇതിന്റെ പകയാകാം കൊലപാതകത്തിലേക്ക് നയിച്ചതെന്ന് പോലീസ് സംശയിക്കുന്നു.

വാഹനമിടിച്ച് ഗുരുതരമായി പരിക്കേറ്റ ജഡ്ജിയെ പ്രദേശവാസികളിൽ ഒരാളാണ് ആശുപത്രിയിൽ എത്തിച്ചത്. എന്നാൽ അദ്ദേഹം മരണത്തിന് കീഴടങ്ങുകയായിരുന്നു. മരിച്ചത് ആരാണെന്നറിയാതെ മണിക്കൂറുകളോളം ഉത്തം ആനന്ദിന്റെ മൃതദേഹം ആശുപത്രിയിൽ സൂക്ഷിച്ചു. രാവിലെ ഏഴ് മണിയോടെ ജഡ്ജിയെ കാൺന്മാനില്ലെന്നുകാട്ടി വീട്ടുകാർ പരാതി നൽകിയതോടെ നടത്തിയ അന്വേഷണത്തിലാണ് മരിച്ചത് ഉത്തം ആനന്ദാണെന്ന് തിരിച്ചറിഞ്ഞത്.