കടയ്ക്കാവൂർ പോക്സോ കേസ്; അമ്മയെ കള്ളക്കേസിൽ കുടുക്കിയെന്ന പരാതി ഐജി അന്വേഷിക്കും

തിരുവനന്തപുരം: കടയ്ക്കാവൂരിൽ യുവതിയെ പോക്സോ കേസിൽ കുടുക്കിയെന്ന പരാതി ഐജി അന്വേഷിക്കും. ഐജി ഹർഷിത അട്ടല്ലൂരിയുടെ നേതൃത്വത്തിലാണ് കേസ് അന്വേഷിക്കുക. അമ്മയ്ക്കെതിരെ പിതാവ് നൽകിയ പരാതി വ്യാജമാണെന്ന് ഇളയ മകൻ നടത്തിയ വെളിപ്പെടുത്തലിന്റെ അടിസ്ഥാനത്തിലാണ് ഡിജിപിയുടെ ഇടപെടൽ.

കേസിൽ പോലീസ് അനാവശ്യ തിടുക്കം കാണിച്ചുവെന്ന് വനിതാ കമ്മീഷൻ വ്യക്തമാക്കിയിരുന്നു. പോലീസിനെതിരെ സിഡബ്യൂസിയും രംഗത്തെത്തിയിരുന്നു. എഫ്ഐആറിൽ പരാതിക്കാരന്റെ സ്ഥാനത്ത് പേരുചേർത്ത സംഭവത്തിൽ നിയമനടപടിക്കൊരുങ്ങുകയാണ് ശിശുക്ഷേമ സമിതി. ആഭ്യന്തര സെക്രട്ടറിക്കും ഡിജിപിക്കും പരാതി നൽകാനാണ് നീക്കം.

കുട്ടി ലൈംഗിക പീഡനത്തിന് ഇരയായെന്ന പരാതി നൽകിയത് ശിശുക്ഷേമ സമിതിയല്ലെന്ന് ജില്ലാ ചൈൽഡ് വെൽഫെയർ കമ്മിറ്റി വ്യക്തമാക്കിയിരുന്നു. കുട്ടിക്ക് കൗൺസിലിങ് നൽകിയ ശേഷം റിപ്പോ‍ര്‍ട്ട് സമ‍ര്‍പ്പിക്കാനായിരുന്നു പോലീസിന്റെ നി‍ര്‍ദ്ദേശം. പീഡന വിവരം അറിയിച്ചത് തങ്ങളാണെന്നുള്ള വാദം തെറ്റാണെന്നും ശിശുക്ഷേമ സമിതി വ്യക്തമാക്കി.