കൊറോണ പടർത്തുമെന്നാരോപിച്ച് വനിതാ ഡോക്ടർമാർക്കെതിരെ കയ്യേറ്റം; അയൽവാസി അറസ്റ്റിൽ

ദില്ലി: കൊറോണ വൈറസ് പടർത്തുമെന്നാരോപിച്ച് വനിതാ ഡോക്ടർമാരെ കയ്യേറ്റം ചെയ്ത അയല്‍വാസിയെ പൊലീസ് അറസ്റ്റ് ചെയ്തു. ദില്ലിയിലെ സഫ്ദര്‍ജങ് ആശുപത്രിയിലെ രണ്ടു വനിതാ ഡോക്ടര്‍മാരാണ് മർദ്ദനത്തിനിരയായത്. ബുധനാഴ്ച വൈകുന്നേരം ഗൗതം നഗറിലായിരുന്നു സംഭവം.

പ്രദേശത്തെ മാർക്കറ്റിൽനിന്ന് പലചരക്ക് സാധനങ്ങൾ വാങ്ങുന്നതിനായി വീട്ടില്‍ നിന്ന് പുറത്തിറങ്ങിയതായിരുന്നു ഡോക്ടര്‍മാര്‍. ഇതിനിടെ കൊറോണ വൈറസ് പരത്തുന്നതിനായി പുറത്തേക്കിറങ്ങിയതാണോ എന്നാക്രോശിച്ചുകൊണ്ട് അയൽവാസി ‍ഡോക്ടർമാരെ മർദ്ദിക്കുകയായിരുന്നു. ഡോക്ടർമാർ പോലീസിൽ വിവരമറിയിച്ചിരുന്നെങ്കിലും പൊലീസ് എത്തുന്നതിനുമുൻപ് പ്രതി ഓടി രക്ഷപ്പെടുകയായിരുന്നു.

Also Read: ഐസൊലേഷൻ വാർഡിൽ ഡോക്ടറുടെ പീഡനത്തിന് ഇരയായ യുവതി അമിത രക്തസ്രാവത്തെത്തുടര്‍ന്ന് മരിച്ചു

ബുധനാഴ്ച രാത്രിയോടെ 42കാരനായ പ്രതിയെ പോലീസ് പിടികൂടി. ഇയാൾ ഇന്റീരിയർ ഡിസൈനറാണ്. പരുക്കേറ്റ ഡോക്ടർമാർ സഫ്ദര്‍ജങ് ആശുപത്രിയിൽ ചികിത്സയിലാണ്. ഡോക്ടർമാർ നൽകിയ പരാതിയിൽ പോലീസ് കേസെടുത്തു.

അതേസമയം, ദില്ലിയിൽ ഇതുവരെ 669 പേർക്ക് കൊറോണ വൈറസ് സ്ഥിരീകരിച്ചു. ഒമ്പത് പേരാണ് വൈറസ് ബാധ മൂലം മരണപ്പെട്ടത്. കൊറോണ വൈറസ് ഭീതി പർത്തുന്ന 20 ഹോട്ട്സ്പോട്ടുകളാണ് ദില്ലിയിലുള്ളത്. പ്രശസ്തമായ സദാർ ബസാറും ബംഗാളി മാർക്കറ്റും അടച്ചുപൂട്ടിയിരിക്കുകയാണ്. വീട്ടിൽനിന്ന് പുറത്തിറങ്ങുന്നവർ നിർബന്ധമായും മാസ്ക് ധരിക്കണമെന്ന് സർക്കാർ കർശന നിർദ്ദേശം നൽകിയിട്ടുണ്ട്.