മന്ത്രവാദം; 60കാരിയെ കൊന്ന് അറുത്തെടുത്ത തലയുമായി യുവാവ് പോലീസ് സ്റ്റേഷനിൽ കീഴടങ്ങി

ഭുവനേശ്വർ: ഒഡീഷയിൽ വൃദ്ധയെ കൊന്ന് അറുത്തെടുത്ത തലയുമായി യുവാവ് പോലീസ് സ്റ്റേഷനിൽ കീഴടങ്ങി. മന്ത്രവാദം നടത്തിയെന്നാരോപിച്ചാണ് 30കാരനായ ബുദ്ധാറാം സിംഗ് അടുത്തബന്ധുവായ വൃദ്ധയെ കൊലപ്പെടുത്തിയത്. 60കാരിയായ ചാംബ സിംഗ് ആണ് കൊല്ലപ്പെട്ടത്. സംഭവത്തിൽ ബുദ്ധാറാം സിംഗിനെ പോലീസ് അറസ്റ്റ് ചെയ്തു. ഒഡീഷയിലെ മയൂർഭഞ്ച് ജില്ലയിലെ നുവസാഹി ഗ്രാമത്തിൽ തിങ്കളാഴ്ച രാവിലെയായിരുന്നു സംഭവം.

ഒരാഴ്ച മുമ്പ് രോഗം ബാധിച്ച് ബുദ്ധാറാമിന്റെ നാലുവയസുകാരി മകൾ മരിച്ചിരുന്നു. ചാംബയുടെ മന്ത്രവാദം കാരണമാണ് മകൾ മരിച്ചതെന്ന് ബുദ്ധാറാം ബന്ധുക്കളോട് പറഞ്ഞു. ഇതിന് പിന്നാലെ ചാംബയുടെ വീട്ടിലെത്തിയ ബുദ്ധാറാം വരാന്തയിൽ ഉറങ്ങി കിടക്കുകയായിരുന്ന ചാംബയെ മുറ്റത്തേക്ക് വലിച്ചിഴച്ചതിനുശേഷം മർദ്ദിച്ച് കൊലപ്പെടുത്തുകയായിരുന്നു. ഇതിന് പിന്നാലെ അറുത്തെടുത്ത തല ടവ്വലിൽ പൊതിഞ്ഞ് 13 കിലോമീറ്ററോളം നടന്ന് ബുദ്ധാറാം ഖുന്ദ പോലീസ് സ്റ്റേഷനിലെത്തി കീഴടങ്ങി.

Also Read: കൊല്ലം കടക്കലില്‍ പോലീസ് ഉദ്യോഗസ്ഥന്‍ മരിച്ച സംഭവം; പ്രതിക്ക് സ്പിരിറ്റ് നല്‍കിയത് പെണ്‍സുഹൃത്ത്

സംഭവത്തിൽ കൊലക്കുറ്റം ചുമത്തി ബുദ്ധാറാമിനെ പോലീസ് അറസ്റ്റ് ചെയ്തു. ഇയാളുടെ പക്കൽനിന്ന് ചാംബയെ കൊലപ്പെടുത്താനുപയോഗിച്ച കോടാലി പോലീസ് പിടികൂടി. സംഭവം നടന്ന സ്ഥലത്തുനിന്ന് വൃദ്ധയുടെ ഉടൽഭാഗം പോലീസ് കണ്ടെത്തി. അതേസമയം ബുദ്ധാറാം വൃദ്ധയെ കൊലപ്പെടുത്തുന്നത് ഗ്രാമത്തിലെ ആളുകൾ സാക്ഷികളായിരുന്നെങ്കിലും ആരും കുറ്റകൃത്യം തടയാൻ ശ്രമിച്ചിരുന്നില്ലെന്ന് ഖുന്ദ പോലീസ് സ്റ്റേഷനിലെ ഇൻസ്പെക്ടർ ഇൻ ചാർജ് സ്വർമലത മിൻ ബുദ്ധസ് പറഞ്ഞു.