വനിത പോലീസ് കോൺസ്റ്റബിളുമായി പ്രണയം; 25കാരനെ കെട്ടിയിട്ട് തീകൊളുത്തി കൊന്നു

ലഖ്നൗ: കുടുംബത്തിലെ യുവതിയുമായി പ്രണയബന്ധം പുലർത്തിയെന്നാരോപിച്ച് 25കാരനെ ബന്ധുക്കൾ ചേർന്ന് കെട്ടിയിട്ട് തീകൊളുത്തി കൊലപ്പെടുത്തി. ബുജൗനി സ്വദേശിയായ അംബിക പട്ടേൽ ആണ് കൊല്ലപ്പെട്ടത്. ഉത്തർപ്രദേശിലെ പ്രതാപ്ഘട്ട് ജില്ലയിൽ തിങ്കളാഴ്ചയായിരുന്നു സംഭവം.

കാൺപൂരിൽ പോലീസ് കോൺസ്റ്റബിളായി ജോലി ചെയ്യുകയായിരുന്നു യുവതിയുമായി പട്ടേൽ ദീർഘകാലമായി പ്രണയത്തിലായിരുന്നു. ഇരുവരുടേയും പ്രണയബന്ധത്തെച്ചൊല്ലി ഇരുകുടുംബങ്ങളും തമ്മിൽ കലഹം പതിവായിരുന്നു. കുറച്ച് മാസം മുമ്പ് യുവതിയുമൊത്തുള്ള ഒരു വീഡിയോ ക്ലിപ് പട്ടേൽ സോഷ്യൽ മീഡിയയിൽ പങ്കുവച്ചിരുന്നു. ഇതിന് പിന്നാലെയാണ് യുവതിയുടെ കുടുംബം പട്ടേലിനെ തീകൊളുത്തി കൊലപ്പെടുത്തിയത്.

പട്ടേല്‍ വീട്ടില്‍ തനിച്ചായിരുന്ന സമയത്ത് വീട്ടിൽലേക്ക് അതിക്രമിച്ച് കയറിയ പെൺകുട്ടിയുടെ ബന്ധുക്കൾ യുവാവിനെ പുറത്തേക്ക് വലിച്ചിഴച്ച് കൊണ്ടുപോകുകയായിരുന്നു. പിന്നീട് മരത്തിൽ കെട്ടിയിട്ട് ക്രൂരമായി മർദ്ദിക്കുകയും തീകൊളുത്തി കൊലപ്പെടുത്തുകയും ചെയ്തു. ഇതിനുശേഷം പ്രതികൾ സ്ഥലത്തുനിന്ന് ഓടിരക്ഷപ്പെടുകയായിരുന്നുവെന്ന് പ്രതാപ്ഘട്ട് എസ്പി അഭിഷേക് സിംഗ് പറഞ്ഞു.

Also Read: മധ്യപ്രദേശിൽ നാലുവയസുകാരിയെ ബലാത്സംഗം ചെയ്ത് കൊന്ന് മൃതദേഹം കിണറ്റിൽ തള്ളി

യുവാവിനെ കൊലപ്പെടുത്തിയതിന് പിന്നാലെ വലിയ സംഘർഷമായിരുന്നു ഗ്രാമത്തിൽ അരങ്ങേറിയത്. അംബിക പട്ടേലിനെ കൊലപ്പെടുത്തിയവർക്കെതിരെ ഉടൻ നടപടിയെടുക്കണമെന്ന് ആവശ്യപ്പെട്ട് ബന്ധക്കളും നാട്ടുകാരും സംഭവം നടന്ന സ്ഥലത്ത് പ്രതിഷേധം സംഘടിപ്പിച്ചു. അക്രമാസക്തരായ ജനങ്ങൾ രണ്ട് പോലീസ് ജീപ്പ് കത്തിച്ചു. ഇതോടെ വൻ പോലീസ് സന്നാഹം സ്ഥലത്തെത്തി ക്രമസമാധാനം ഉറപ്പിച്ചു. സംഭവത്തിൽ കേസെടുത്ത് അന്വേഷണം ആരംഭിച്ചതായി എസ്പി അഭിഷേക് സിംഗ് പറഞ്ഞു. അറിയിച്ചു.