കോഴിക്കോട് യുവാവ് വെടിയേറ്റു മരിച്ചു; ഒരാള്‍ കസ്റ്റഡിയിൽ

കോഴിക്കോട്: കോഴിക്കോട് വിലങ്ങാടിനു സമീപം യുവാവ് വെടിയേറ്റു മരിച്ചു. ഇന്ദിരാ നഗര്‍ സ്വദേശിയായ റഷീദ് (30) ആണ് മരിച്ചത്. നായാട്ടിനിടെ അബദ്ധത്തിൽ വെടിപൊട്ടിയാണ് ഇയാള്‍ മരണപ്പെട്ടതെന്നാണ് പോലീസിനു ലഭിച്ചിരിക്കുന്ന പ്രാഥമിക വിവരം.

വിലങ്ങാടിനു സമീപം പുള്ളിപ്പാറ വനമേഖലയിൽ വെച്ചായിരുന്നു സംഭവമുണ്ടായത്. കാട്ടുപന്നികളെ വേട്ടയാടാനായി സുഹൃത്തുമൊത്തു പോയ റഷീദ് കൊല്ലപ്പെടുകയായിരുന്നുവെന്നാണ് വിവരം. അബദ്ധത്തിൽ തോക്കിൽ നിന്ന് വെടിയുതിര്‍ന്നതാണെന്നാണ് പ്രാഥമിക വിവരമെങ്കിലും ഒരാള്‍ പോലീസ് കസ്റ്റഡിയിലുള്ളതായി സൂചനയുണ്ട്.

ഇന്നലെ രാത്രിയിലാണ് റഷീദും സുഹൃത്തും ചേർന്ന് പുള്ളിപ്പാറ വനമേഖലയിൽ നായാട്ടിനു പോയത്. ഇതിനു ശേഷമായിരുന്നു സംഭവമുണ്ടായത്. റഷീദ് മരണപ്പെട്ട വിവരം സുഹൃത്ത് തന്നെയാണ് പോലീസിനെ അറിയിച്ചത്. റഷീദിൻ്റെ മൃതദേഹം കുറ്റ്യാടി താലൂക്ക് ആശുപത്രിയിലാണ് സൂക്ഷിച്ചിരിക്കുന്നത്. പോസ്റ്റ്മോർട്ടത്തിനായി മൃതദേഹം കോഴിക്കോട് മെഡിക്കൽ കോളേജ് ആശുപത്രിയിലേയ്ക്ക് എത്തിക്കുമെന്ന് വിവരമുണ്ട്.