കൊറോണ പകർത്തുമെന്ന് ഭീഷണി; ബ്രിട്ടനിൽ അമ്പത്തിയഞ്ചുകാരന് ആറുമാസം തടവുശിക്ഷ

ലണ്ടൻ: കൊറോണ വൈറസ് പകർത്തുമെന്ന് പൊലീസ് ഉദ്യോഗസ്ഥനെ ഭീഷണിപ്പെടുത്തിയ അമ്പത്തിയഞ്ചുകാരന് ജയിൽശിക്ഷ വിധിച്ച് യുകെ കോടതി. ഡ്യൂട്ടിയിലുണ്ടായിരുന്ന പൊലീസ് ഉദ്യോഗസ്ഥന്റെ മുഖത്ത് കഫം തുപ്പുകയും കൊറോണ വൈറസ് പകർത്തുമെന്ന് ഭീഷണി മുഴക്കുകയും ചെയ്ത ആഡം ലൂയിഡ് എന്നയാളെയാണ് ബ്രിട്ടനിലെ വെസ്റ്റ്മിൻസ്റ്റർ മജിസ്‌ട്രേറ്റ് കോടതി ആറുമാസം തടവുശിക്ഷയ്ക്ക് വിധിച്ചത്.

ചൊവ്വാഴ്ച ഉച്ചയ്ക്ക് സെൻട്രൽ ലണ്ടനിൽ വച്ചാണ് കേസിനാസ്പദമായ സംഭവം നടക്കുന്നത്. ഡ്യൂട്ടിക്കിടെയാണ് പൊലീസ് ഉദ്യോഗസ്ഥൻ ആഡമിനെ കാണുന്നത്. ആ സമയത്ത് അയാൾ സമീപത്തുണ്ടായിരുന്ന കാറുകളുടെ വാതിലുകൾ തുറക്കാൻ ശ്രമിക്കുകയായിരുന്നു. ഇത് ശ്രദ്ധയിൽപ്പെട്ട ഉദ്യോഗസ്ഥൻ ആഡമിനെ തടഞ്ഞുനിർത്തി പരിശോധിച്ചു.

Also Read: കൊവിഡ്: യുഎസിൽ ആറ് ആഴ്‌ച പ്രായമുള്ള കുഞ്ഞ് മരിച്ചു

ഇതിൽ പ്രകോപിതനായ ആഡം നിലത്തുണ്ടായിരുന്ന വൈൻ കുപ്പി പൊട്ടിച്ച് പൊലീസ് ഉദ്യോഗസ്ഥനെ ഭീഷണിപ്പെടുത്തുകയും അസഭ്യം പറയുകയുമായിരുന്നുവെന്ന് മെട്രോപൊളിറ്റൻ പൊലീസ് നൽകിയ പ്രസ്താവനയിൽ പറഞ്ഞു. കൂടാതെ, താൻ കൊവിഡ് 19 രോഗബാധിതാണെന്നും താങ്കളുടെ മുഖത്ത് കഫം തുപ്പുന്നതോടെ താങ്കളും രോഗബാധിതനാകുമെന്നും ആഡം ഉദ്യോഗസ്ഥനെ ഭീഷണിപ്പെടുത്തി. തുടർന്ന് പൊലീസ് ഉദ്യോഗസ്ഥന് നേരെ പ്രതി തുപ്പുകയും ദേഹത്ത് കടിക്കുമെന്ന് ഭീഷണി മുഴക്കുകയും ചെയ്തുവെന്നും പ്രസ്താവനയിൽ ആരോപിക്കുന്നു.

ഇതിന് പിന്നാലെ ആഡമിനെ പൊലീസ് അറസ്റ്റ് ചെയ്യുകയും ബുധനാഴ്ച കോടതിയിൽ ഹാജരാക്കുകയും ചെയ്യുകയായിരുന്നു. 2018 നവംബറിൽ അവതരിപ്പിച്ച പ്രത്യേക നിയമപ്രകാരമാണ് ഇയാൾക്കെതിരെ നടപടി എടുത്തത്. ഈ നിയമപ്രകാരം എമർജൻസി വർക്കേഴ്സിനെതിരെയുള്ള ആക്രമണങ്ങളിൽ അറസ്റ്റിലാകുന്നർക്ക് പരമാവധി 12 മാസം വരെ തടവുശിക്ഷ ലഭിച്ചേക്കാം.