പുതുവത്സരം ആഘോഷിക്കാൻ എത്തിച്ചത് 1 കോടിയുടെ ലഹരിവസ്തുക്കൾ; ഒരാൾ പിടിയിൽ

മുംബൈ: പുതുവത്സര ആഘോഷങ്ങൾക്കായി മുംബൈയിൽ എത്തിച്ച ഒരുകോടിയുടെ ലഹരി വസ്തുക്കൾ പിടികൂടി. നാർകോടിക്സ് ബ്യൂറോ നടത്തിയ റെയ്ഡിൽ ഒരു ഇവന്റ് മാനേജ്മെന്റ് കമ്പനി ഉടമയാണ് അറസ്റ്റിലായതെന്ന് ഹിന്ദുസ്ഥാൻ ടൈംസാണ് റിപ്പോർട്ട് ചെയ്തത്. നാല് കിലോ ചരസ്, 11 കിലോ കഞ്ചാവ് എന്നിവയാണ് ഇയാളിൽ നിന്ന് പിടികൂടിയത്.

ഡിസംബർ 31ന് പുതുവത്സര ആഘോഷ പാർട്ടികളിൽ വിതരണം ചെയ്യാനെത്തിച്ച ലഹരി വസ്തുക്കളാണിതെന്ന് എൻസിബി ഉദ്യോഗസ്ഥർ അറിയിച്ചു. എൻസിബി മുംബൈ സോണൽ യൂണിറ്റിന് ലഭിച്ച വിവരത്തിന്‍റെ അടിസ്ഥാനത്തിൽ നടത്തിയ പരിശോധനയിലാണ് ലഹരി വസ്തുക്കൾ പിടികൂടിയത്. മുംബൈ മുലുന്ദ് ചെക്ക് നാകയിൽ നിന്നാണ് അഷ്റഫ് മുസ്തഫ ഷാ എന്നയാൾ പിടിയിലാകുന്നത്. ഇയാൾ താനെ സ്വദേശിയാണ്.

Also Read : വിവാഹേതര ബന്ധം ഭാര്യ തുറന്ന് പറഞ്ഞു; മക്കളെ കൊലപ്പെടുത്തി യുവാവ് ജീവനൊടുക്കി

താമസസ്ഥലത്തു നിന്നും മുംബൈയിലേക്കുള്ള വഴിയേയാണ് അഷ്റഫ് മുസ്തഫ ഷായെ പിടികൂടിയതെന്ന് എൻസിബി ഉദ്യോഗസ്ഥർ പറഞ്ഞു. ഇയാൾ രക്ഷപ്പെടാൻ ശ്രമിച്ചെങ്കിലും പിന്തുടർന്ന് പിടികൂടുകയായിരുന്നെന്നും ഉദ്യോഗസ്ഥർ വ്യക്തമാക്കി.

അഷ്റഫ് മുസ്തഫയുടെ കയ്യിൽ നിന്നും നാല് കിലോഗ്രാം ചരസ് കണ്ടെത്തി. തുടർന്ന് ഇയാളുടെ വീട്ടിൽ നടത്തിയ റെയ്ഡിലാണ് 11 കിലോ ക‍ഞ്ചാവ് കണ്ടെത്തിയത്. ചോദ്യം ചെയ്യലിനിടെ ഡിസംബർ മുപ്പത്തിയൊന്നിന് പാർട്ടികളിൽ വിതരണം ചെയ്യാനായി ജമ്മു കശ്മീരിൽ നിന്ന് എത്തിച്ചതാണ് ലഹരിവസ്തുക്കളെന്ന് അഷ്റഫ് മുസ്തഫ സമ്മതിച്ചു.

വിവാഹം കഴിഞ്ഞ് മൂന്ന് വർഷമായിട്ടും ഗർഭിണിയായില്ല; ഭർത്താവും ബന്ധുക്കളും ചേർന്ന് യുവതിയെ കൊലപ്പെടുത്തി

മുംബൈയിലെ ലഹരി വസ്തു വിതരണക്കാരുമായും വിൽപ്പനക്കാരുമായും ബന്ധമുള്ളയാളാണ് മുസ്തഫയെന്ന നാർകോടിക്സ് കൺട്രോൾ ബ്യൂറോ ഉദ്യോഗസ്ഥർ പറയുന്നു. മുംബൈയിൽ എവിടെയൊക്കെയാണ് പാർട്ടികൾ നടത്തുന്നതെന്നും ആർക്കൊക്കെയാണ് വിതരണം ചെയ്യുന്നതെന്നും ഇയാളിൽ നിന്ന് കണ്ടെത്താനുള്ള ശ്രമത്തിലാണ് ഉദ്യോഗസ്ഥർ. ഇയാളുടെ ഫോൺ രേഖകളും സംഘം പരിശോധിക്കുന്നുണ്ട്. കൂടുതൽ ചോദ്യം ചെയ്യലിനായി ഇയാളെ റിമാൻഡിൽ വിട്ടിരിക്കുകയാണ്.