ഓൺലൈൻ സൈറ്റ് വഴി 11 ലക്ഷത്തിന്റെ ഐഫോണുകളും കാമറയും തട്ടി; ഇരിട്ടി സ്വദേശികൾ അറസ്റ്റിൽ

കണ്ണൂർ: ഓൺലൈൻ വ്യാപാര വെബ്സൈറ്റുകൾ വഴി 11 ലക്ഷം രൂപയുടെ ഉത്പന്നങ്ങൾ തട്ടിയെടുത്ത സംഭവത്തിൽ രണ്ടുപേർ അറസ്റ്റിൽ. വ്യാജ മേൽവിലാസം ഉപയോഗിച്ച് 30 ഐ ഫോണുകളും ഒരു കാമറയുമാണ് സംഘം തട്ടിയെടുത്തത്. ഫ്ലിപ്കാർട്ടിൽ നിന്നും ഇരിട്ടിയിലേക്ക് അയച്ച സാധനങ്ങളാണ് മൂന്നംഗ സംഘം കൈക്കലാക്കിയത്.

ഓഫറുള്ള സമയങ്ങളിലാണ് ഇവർ വ്യാജ മേൽവിലാസത്തിൽ ഉത്പന്നങ്ങൾ ഓഡർ ചെയ്തിരുന്നത്. ഫോണുകൾ എത്തിയാൽ പാക്കറ്റിന്റെ സീൽ പൊട്ടിക്കാതെ മൊബൈൽ ഫോൺ മാത്രം മാറ്റും. മംഗലാപുരത്തു നിന്നും വാങ്ങിയ ഡമ്മികളായിരുന്നു ഇവർ പാക്കറ്റിൽ തിരികെ വെച്ചിരുന്നത്. ഇത് തിരികെ അയച്ചായിരുന്നു സംഘത്തിന്റെ തട്ടിപ്പ്.

തട്ടിയെടുത്ത ഫോണുകൾ കണ്ണൂരിലും മംഗലാപുരത്തും ഇവർ മറിച്ചുവിറ്റു. ഇത്തരത്തിലാണ് 30 ഫോണുകളും ഒരു കാമറയും ഇവർ തട്ടിയെടുത്തത്. ഇടപാടുകാർക്ക് സാധനങ്ങൾ എത്തിച്ചു നൽകാൻ ചുമതലയുള്ള ഫ്രാഞ്ചൈസിയുടെ പരാതിയിലാണ് കേസെടുത്തത്. കരിക്കോട്ടക്കരി സ്വദേശിയിൽ നിന്നും മറ്റൊരാളിൽ നിന്നും 20 ഫോണുകൾ കണ്ടെത്തിയിട്ടുണ്ട്. സംഘത്തിലെ പ്രധാനി സംസ്ഥാനം വിട്ടെന്നാണ് പോലീസ് നൽകുന്ന വിവരം.