ലോഡ്‌ജിൽ തങ്ങിയ യുവതി പ്രസവിച്ച കുഞ്ഞുങ്ങൾ മരിച്ചു: സുഹൃത്ത് അറസ്റ്റിൽ

ഗുരുവായൂർ: ലോഡ്‌ജിൽ സുഹൃത്തിനൊപ്പം മുറിയെടുത്ത ഗർഭിണി പ്രസവിച്ച ഇരട്ടക്കുട്ടികൾ മരിച്ചു. തുടർന്ന് സുഹൃത്തിനെതിരെ പോലീസ് കേസെടുത്തു. ഏഴു മാസം ഗർഭിണിയായ യുവതിയാണ് സുഹൃത്തിനൊപ്പം ലോഡ്‌ജിൽ സുഹൃത്തിനൊപ്പം തങ്ങിയത്. എറണാകുളം സ്വദേശിയായ മനോജ് കൃഷ്ണൻ (41) എന്ന സുഹൃത്തിനൊപ്പമാണ് യുവതി ഗുരുവായൂരിലെ ലോഡ്‌ജിലെത്തിയത്.

പങ്കാളിക്കും കുട്ടികൾക്കുമൊപ്പം കഴിയുന്നതിനിടെയാണ് യുവതിയും മനോജ് കൃഷ്ണനും ഗുരുവായൂരിൽ മുറിയെടുത്ത് താമസം തുടങ്ങിയത്. തൃശൂർ കൊടകര സ്വദേശിനിയായ 34കാരിയാണ് യുവതി. ഏഴു മാസം ഗർഭിണിയായിരുന്ന യുവതി ഇരട്ട പെൺകുഞ്ഞുങ്ങളെയാണ് പ്രസവിച്ചത്.

നാല് ദിവസം മുൻപാണ് യുവതിയും മനോജ് കൃഷ്ണനും ഗുരുവായൂരിലെ ലോഡ്‌ജിൽ മുറിയെടുത്തത്. തിങ്കളാഴ്ച രാത്രി യുവതിക്ക് പ്രസവവേദന ഉണ്ടായതോടെ ആശുപത്രിയിൽ പ്രവേശിപ്പിക്കാൻ ശ്രമിച്ചു. എന്നാൽ, ആശുപത്രിയിലേക്ക് പോകും വഴി തന്നെ യുവതി ഒരു കുഞ്ഞിനെ പ്രസവിച്ചു. അല്പസമയത്തിന് ശേഷം രണ്ടാമത്തെ കുഞ്ഞിനെയും പ്രസവിച്ചു. രണ്ടു കുഞ്ഞുങ്ങളും അപ്പോൾ തന്നെ മരിച്ചു. പോസ്റ്റുമോർട്ടത്തിൽ കുട്ടികൾ ഗർഭാവസ്ഥയിൽ തന്നെ മരിച്ചെന്ന് വ്യക്തമായതായി പോലീസ് അറിയിച്ചു.